DILI, 18 Fevereiru 2026 (TATOLI)—Governu Timor-Leste liuhusi Mintru Negósiu Estranjeiru no Kooperasaun (MNEK), Bendito dos Santos Freitas, manda ona karta ofisiál ba nasaun membru Komunidade sira Ko’alia Lian Portugés (CPLP-sigla portugés) hodi reafirma katak Guiné-Bisau nia fatin iha organizasaun ne’e laiha dúvida.
“Prezidénsia timoroan iha nafatin kompromisu metin ba diálogu konstrutivu, solidariedade entre Estadu-membru sira, no respeitu ba soberania no legalidade konstitusionál. Ami repete katak Guiné-Bisau nia fatin iha CPLP laiha dúvida no ami-nia prioridade tenke kontinua sai hanesan promosaun ba kondisaun sira-ne’ebé favorese estabilidade institusionál no entendimentu polítiku,” refere nota ne’ebé TATOLI asesu direita husi Ministru MNEK, Bendito Freitas, tersa ne’e.
Bendito hateten, nu’udar Ministru Negósiu Estranjeiru no Kooperasaun Repúblika Demokrátika Timor-Leste no Ministru Prezidénsia Konsellu Ministru CPLP nian, dirije ba nasaun membru nia lider sira, iha tempu ne’ebé ezije konsiderasaun, koezaun no sentidu responsabilidade kompartida.
“Eventu sira foin lalais ne’e ne’ebé envolve Guiné-Bisau provoka ona reasaun no interpretasaun oioin iha esfera públika. Ami komprende katak sirkunstánsia sira hanesan ne’e labele kompromete buat ne’ebé esensiál: ita-nia Komunidade nia unidade no kompromisu koletivu ba prinsípiu sira ne’ebé ita asume ho livre,” Bendito hateten iha karta ofisiál ne’e.
Nia dehan tan: “Ami rekoñese katak mekanizmu sira artikulasaun no komunikasaun nian bele no tenke hadi’a beibeik. Iha espíritu ida-ne’e, ita sei hala’o avaliasaun interna ida ho hanoin atu hametin koordenasaun entre Estadu-membru sira, hodi garante previzibilidade boot liu no efikásia iha inisiativa sira-ne’ebé hala’o iha ámbitu Prezidénsia nian”.
Misaun Good Offices sei kontinua konsidera hanesan instrumentu relevante CPLP nian. Ajustamentu eventuál ruma ba nia formatu ka metodolojia sei sujeita ba konsulta no konsensu entre ema hotu, hodi prezerva natureza kolejiál hosi ami nia organizasaun.
“Ha’u konvensidu katak, ho serenidade, respeitu mútuo no ho sentidu estratéjiku, ita sei hatene transforma momentu ne’e iha reforsu ba maturidade polítika CPLP nian. Ha’u disponivel nafatin ba konsulta bilaterál sira ka koordenasaun adisionál ne’ebé Ita-boot nia Exelénsia sira konsidera nesesáriu,” nia konklui.
TATOLI
