DILI, 20 Fevereiru 2026 (TATOLI)—Ekipa konjunta kompostu husi Polísia Nasionál Timor-Leste (PNTL), Diresaun Nasionál Servisu Investigasaun Kriminál (DNSIK), Servisu Migrasaun no Forénsiku, Sesta maizumenus tuku 18:06, halo buska no apreensaun ba sidadaun xineza na’in-18, iha área Fomentu 1, tanba suspeitadu halo prátika jogu ilísitu scam online.
Sidadaun estranjeiru hirak ne’e mai Timor-Leste separadamente, balun mai hahú iha loron 09 Fevereiru tinan ne’e, balun mai iha loron 10, balun mai iha loron 11 no balun iha loron 12.
Sira aluga uma husi timoroan ida ho inisiál X, iha Fomentu 1, Suku Komoro, Postu Administrativu Dom Aleixo, Munisípiu Dili. Xineza sira ne’e hatama ekipamentu atu halo prátika jogu ilísitu scam online.
Iha prosesu buska no apreensaun ne’e, uma-na’in konsege la koopera ho ekipa tanba tama derrepente, nune’e hafoin halo diskusaun naruk ho ekipa, ikus mai uma-na’in koopera no autoriza ekipa halo asaun.
Durante prosesu, ekipa konjunta hetan brankas osan ida, komputadór kaixa tolu no meza rua no kadeira ne’ebé prepara atu instala ba prátika jogu ilísitu scam online.
Ekipa hetan tan evidénsia balun hanesan ekipamentu koneksaun internet inklui dokumentu komprovativu hanesan pasaporte hodi apoiu sidadaun estranjeiru sira-nia atividade.
Notísia relevante : MP kontinua investiga kazu scam no jogu online
Hafoin ne’e, ekipa konjunta lori kedan xineza sira inklui kazál hanesan na’in ba uma hodi submete ba prosesu identifikasaun durante oras 12 iha DNSIK Komandu Jerál PNTL, Kaikoli.
Hatán ba kestaun ne’e, Diretór Polísia Sientífika Investigasaun Kriminál (PCIC, sigla portugés), Vicente Fernandes Brito, hateten, Governu antes ne’e bandu ona atividade jogu ilísitu hanesan scam online, tanba ne’e bainhira ema ruma la
kumpre ba desizaun ne’e maka sei submete ba prosesu justisa.
“Daudaun jogu ilísitu online iha Timor la eziste ona, ita hamutuk ho inspesaun jogu kontinua kontrolu, halo supervizaun, observasaun, Servisu Informsaun PCIC dehan la eziste, se eziste, informa no ba kaer,” Vicente hato’o ba jornalista sira iha edifísiu CAC, Farol.
Ekipa konjunta kontinua buka tuir sidadaun sira seluk ne’ebé tuir informasaun serbisu hamutuk ho xineza na’in-18 ne’e hodi halo prátika jogu ilísitu.
Jornalista : Natalino Costa
Editora : Julia Chatarina
