DILI, 20 Fevereiru 2026 (TATOLI)—Komandu Polísia Nasionál Timor-Leste (PNTL) planeia atu kondekora membru sira ne’ebé dedika-an ona serví instituisaun durante tinan-25 nia laran ho medalla komportamentu ezemplár iha ámbitu selebrasaun aniversariu ezistensia instituisaun iha loron 27 Marsu tinan ne’e.
“Daudaun mós ami komisaun ba preparasaun aniversáriu PNTL nia ba dala-25, ami prepara no propoin atu membru sira ne’ebé kompleta ona durante 25 anos, ita aprezenta ba exelénsia Komandante Jerál para hasai despaisu hodi hetan medalla komportamentu ezemplár ba membru sira ne’ebé kumpre ona serbisu durante 25 anos, la komete iha infrasaun disiplinar prosesu no krime ruma ne’ebé hetan koordenasaun. Sira ne’ebé livre ita rekomenda para sira hetan kondekorasaun iha 27 Marsu agora,” Komandante Komandu Pesoa Formasaun PNTL, Superintendente Xefe Polísia Arquimino Ramo, informa ba Ajénsia TATOLI iha ninia knaar fatin, Batallaun Orden Públiku (BOP), Kakoli, Kinta ne’e.
Notísia relevante : Horta simu kondekorasaun Amílcar Cabral husi Estadu Guiné-Bissau
Kondekorasaun ne’e ba membru hotu, liuliu ba membru hotu ne’ebé halo ona serbisu durante tinan 25.
“Signifika sira ne’ebé gradua antes 27 Marsu 2001, ne’ebé iha Marsu 2026 ne’e sira bele hetan ona kondekorasaun ba medalla komportamentu ezemplár,” nia akresenta.
Superintendente Xefe Polísia hatutan: “Kondekorsaun medalla komportamentu ezemplár ne’e inklui mós eis Komisáriu Polísia Nasionál Timor-Leste hahú husi Paulo Martins to’o Komisáriu Jerál PNTL Polísia Henrique da Costa.”
Komandu Pesoa Formasaun daudaun ne’e halo hela cross check ba lista sira hodi manda ba Departamentu Justisa, karik membru balun iha infrasaun displinár.
“Tanba sira ne’ebé hetan medalla komportamentu ezemplár ne’e ba membru sira ne’ebé serbisu ona ba instituisaun PNTL hamutuk tinan 25, livre husi kazu disiplinar, no kazu krime sira ne’ebé eljível ba hetan kondekorasaun,” nia katak.
Jornalista : Natalino Costa
Editora : Julia Chatarina
