DILI 20 Fevereiru 2026 (TATOLI)—Polísia Sientífika Investigasaun Kriminál (PCIC, sigla portugéz) finaliza ona ezame dijitál forense ba Vise-Prezidente Timor GAP ho inisiál AC nia telemóvel.
“Ha’u prezume prosesu ne’e remete ona ba Ministériu Públiku ba rezultadu ezame telemóvel. Ezaminasaun ba telemóvel no kualker objetu aprendidu sira ne’e. Ha’u hanoin ba ekipamentu sira ne’e no ha’u ladun haree apreensaun, ha’u so despaisi de’it para dijitál forense ba PCIC prosede ezame krusiál, konforme prazu ne’ebé mak iha despaisu,” Diretór PCIC, Vicente Fernandes a Brito, hato’o ba Jornalista sira bainhira partisipa serimónia aniversariu ezisténsia Komisaun Antí-Korrupsaun (CAC) ba dala-XVI, ne’ebé hala’o iha edifísiu Faról, Sesta ne’e.
Nia dehan, kazu ne’e daudaun ne’e PCIC remete ona ba Ministériu Públiku.
Iha biban ne’e mós Vicente a Brito informa katak, durante tinan 2025 kazu krime pendente ne’ebé PCIC atende ne’e hamutuk 140-resin.
“Kazu pendente ne’ebé mak daudaun sei pendente PCIC ne’e se la sala hamutuk 140 hanesan ne’e husi Janeiru 2025 to’o mai iha Fevereiru 2026, kazu mai husi husi Baukau, Kovalima, Dili no Oekusi,” nia akresenta.
Husi kazu sira ne’e, maioria kazu burla agravadu, falsifikasaun dokumentu husi veteranu sira, violasaun seksual, esplorasaun ilísitu jogu no omesidu, ne’ebé mak tama iha kompetensia PCIC nian.
Nia informa, kazu sira ne’ebé mak pendente barak ne’e tanba sei iha prosesu investigasaun nia laran no PCIC presiza konklui hafoin bele remete ba iha Ministériu Públiku.
“Kazu pendente ne’e tanba prosesu ne’e investiga hela, ba mai no delega ba prazu hotu husu fali prazu. No kazu sira pendente ne’e husi 2025 to’o 2026, tanba foun mós mai tan,” nia reforsa.
Notísia relevante : CAC halo ezame ba Jerente Timor GAP nia telemóvel
Kada fulan PCIC sempre submete rezultadu investigasaun ba Ministériu Públiku.
“Setiap bulan ne’e ami submete kazu ne’ebé ami halo ona finalidade hamutuk 10 haruka filafali entrega ba Suai, Oekusi, Dili no Baukau, tanba buat ne’ebé mak ami halo investigasaun ne’e bazeia ba despaisu Prokuradór nian, se ba durante loron 60 entaun ita halo ba loron ne’e se durante loron 30, entaun ita halo durante loron ne’e rasik,” nia hatutan.
Jornalista : Natalino Costa
Editora : Julia Chatarina
