DILI, 20 Fevereiru 2026 (TATOLI)—Partidu Demokrátiku (PD) hahú halo konferénsia iha nível postu administrativu odi hametin estrutura iha baze, no hafoin ne’e mak realiza kongresu no konferiénsia nasionál hodi prepara ba eleisaun prezidensiál iha tinan 2027.
Prezidente Komisaun Polítika Nasionál husi PD, Adriano do Nascimento, hateten partidu ninia atividade halo konferénsia postu administrativu nian ne’ebé iha postu lubun hala’o ona mak hanesan iha munisípiu Bobonaru ho Lautein ramata ona, no agora prepara ba konferénsia munisípiu nian.
“Bainhira postu hotu mak hakat ba konferiénsia munisipál, depois hakat ba kongresu nasionál, ami hakarak lais,” Nia hateten ba Agência Tatoli iha resintu Parlamentu Nasionál, ohin.
Nia salienta, konferénsia no kongresu nasionál ne’ebé sei hala’o ho ninia objetivu atu hili líder foun partidu nian, ko’aliakona-ba atualiza programa governasaun no diskute estatutu partidu.
Aleinde ne’e, nia hateten, prepara ba eleisaun prezidensiál ne’ebé sei hala’o iha tinan 2027 no eleisaun sira seluk tan.
“Nu’udar Partidu Demokrátiku eziste kle’ur ona, ami preparadu ba eleisaun prezidensiál no parlamentár,” nia dehan.
Antes ne’e, Prezidente Komisaun Nasionál Eleisaun (CNE), José Agostinho da Costa Belo, husu partidu sira atu realiza konferiénsia no kongresu nasionál iha tinan ne’e, tanba Lei Partidu Polítiku mak ezije antes hasoru eleisaun prezidensiál iha 2027.
Notísia Relevante: CNE solisita ba partidu polítiku sira halo kongresu atu hasoru eleisaun prezidensiál
Jornalista : Nelson de Sousa
Editora : Maria Auxiliadora
