DILI, 23 Fevereiru 2026 (TATOLI)-Federasaun Kooperativa Kréditu Hanai Malu (FCCHM, sigla portugés) disponibiliza, entre 23 no 27 Fevereiru, formasaun kona-ba jestaun no lideransa kooperativa ba dirijente no estrutura kooperativa na’in-30 husi Vikeke.
Jerente Jerál FCCHM, Elizário Ferreira, hateten formasaun ne’e halo ba kooperativa neen ne’ebé Adventist Development and Relief Agency (ADRA) harii iha munisípiu ne’e no bazeia mós ba sira-nia pedidu.
Matéria sira ba formasaun ne’e kona-ba lei kooperativa nian, prinsípiu kooperativa, no funsaun no papél dirijente kooperativa nian.
Iha formasaun loron ikus nian formandu sira sei halo vizitá ba kooperativa neen iha Dili, inklui Kooperativa Klibur Kréditu Uniaun, Kooperativa Defisiénte, no Kooperativa Esperansa.
Vizita estudu ne’e halo tanba dirijente sira ba kooperativa ne’ebé foin harii presiza hatene atu asegura kooperativa ninia sustentabilidade, finanseiru no ekonómiku.
“Asegura sustentabilidade instituisionál signifika tenke funsiona di’ak, asegura sustentabilidade finanseira signifika kooperativa tenke mantein estabilidade finanseira hodi fó kréditu ba nia membru. Sustentabilidade ekonómiku katak osan ne’ebé nia fó ba membru sira tenke jere ho di’ak hodi dezenvolve kooperativa iha nivel baze, nune’e bele fó benefísiu ekonómiku ba nia membru sira”, Elizário Ferreira dehan ba Tatoli, iha Bairru Pité, ohin.
Nia haktuir katak daudaun ne’e FCCHM rejista ona kooperativa hamutuk 61, iha membru rihun 48 no iha kapitál millaun $32.
Jerente ba Projetu Agroforestry Skills husi (ADRA), Moises Pinto Henriques, hateten formasaun ne’ebé FCCHM realiza ne’e importante, tanba iha tópiku tolu ne’ebé treinadór aborda mak kona-ba lideransa, planu negósiu no character-building training.
“Tópiku tolu ne’e impotante tebes ba lideransa neen ne’ebé projetu Agroforestry serbisu ba iha munisípiu Vikeke, tanba kooperativa neen mak sai parseiru implementadór iha terrenu. Liuhusi treinamentu ne’e fó abilidade ba lideransa kooperativa atu sai na’in ba kooperativa no futuru projetu ne’e ramata lideransa no membru kooperativa mak sei kontinua atividade ne’e hodi dezenvolve setór ekonómiku iha kada suku”, dehan.
ADRA serbisu iha Vikeke dezde 2010 no harii ona kooperativa kréditu hamutuk 12 ho ninia membru rihun 7-resin.
“ADRA mai ho programa dezenvolvimentu ekonómiku, entaun ami mós hanorin grupu agrikultór sira hahú transforma produtu ai-lia ba rebusadu, nuu ba mina-nuu, no projetu Agroforestry ne’e daudaun investe fali nuu nia kulit ba coco fiber, matras, no seluk tan”, informa.
Iha biban ne’e, nia parte mós husu ba FCCHM hafoin disponibiliza formasaun, iha futuru fó asisténsia direta bá iha terrenu, hodi haree atividade membru kooperativa nian.
Jornalista: Arminda Fonseca
Editora: Maria Auxiliadora
