DILI, 23 Fevereiru 2026 (TATOLI)—FALINTIL-Forsa Defeza Timor-Leste (F-FDTL) no Tentara Nasional Indonesia (TNI) husi Angkatan Darat, asina ona akordu kooperasaun hodi hala’o treinamentu kona-ba troka informasaun husi parte Servisu Intelijénsia no kapasitasaun ba kaveleria no klase ba kapitaun.
“Ohin ami asina akordu ba tinan 10 nian, kona-ba apoiu treinu no edukasaun ne’ebé TNI liuhusi Angkatan Darat fó mai ita-nia F-FDTL husi komponente terrestre, oinsá atu fó kapasitasaun ba ita-nia Forsa sira tantu husi soldadu to’o ofisiál ne’ebé mak hetan oportunidade,” Komadante Komponente Terrestre, Koronel Domingos da Costa Soares ‘DOBU’ hato’o ba Jornalista sira iha JL World, Metiaut, Segunda ne’e.
Kooperasaun ne’e atu fó kapasitasaun ba Servisu Intelijénsia, Edukasaun Fízika no operasaun tátika militár nian.
Parte TNI sei fahe esperiénsia ba membru F-FDTL sira, ne’ebé iha membru Militár na’in-tolu mak bá indonézia hodi tuir formasaun.
Notísia relevante : UPF-TNI komprometidu garante seguransa durante natál no tinan foun iha fronteira
Akordu ne’e hodi implementa ba tinan-10, liuliu kona-ba Informasaun Intelijénsia iha Fronteira no rai-laran.
Iha fatin hanesan, Deputy Assistant Chef Of Staff for Intelligence, Brigadeiru Jenerál Vilian Wicaksono, hateten INAMOR AWG sai nu’udar plataforma importante hodi hametin kooperasaun bilaterál entre parte rua.
Nia deklara, fórum ne’e hatudu kontinuasaun, konfiansa, no kompromisu atu harii parseiru no solidaridade ne’ebé forte liután.
Relasaun ne’ebé kria entre ezersitu no F-FDTL refleta iha aktividade oin-oin inklui troka profisionál, ezersísiu konjunta kooperasaun edukativu no formasaun, ne’ebé iha kooperasaun entre asaun rua ne’e.
“Ha’u fi’ar katak, AWG INAMOR ba dala-10 ne’e sei sai hanesan marku signifikativu ida iha ami-nia esforsu sira atu hametin koordenasaun, dezenvolve inisiativa foun sira ba kooperasaun iha futuru, no kontinua ami-nia kompromisu fahe ba pás, estabilidade no seguransa rejionál. Ha’u fiar katak liuhusi sorumutu ne’e, ita sei bele halo revizaun ba realizasaun sira, troka hanoin, no dezenvolve programa foun sira neebe sei lori benefísiu mútuo ba ezérsitu rua ne’e iha futuru,” nia informa.
Biban ne’e, nia hato’o apresiasaun boot ba prezensa no partisipasaun ativu iha enkontru bilaterál ne’e atu nafatin forsa.
“Kada tinan ami sempre hala’o diskusaun hamutuk TNI liuhusi Angkatan Darat ho F-FDTL. Ita Servisu hamutuk kona-ba Servisu Militár nian ba oin nafatin ha’u espera katak ba tinan 2026 ba oin ita sei halo buat barak,” nia deklara.
Bainhira koperasaun ne’e ba oin sei fahe pontu tolu importante hanesan Informasaun Intelijénsia no parte Edukasaun tanba daudaun membru F-FDTL na’in-haat mak tuir Formasaun Akademia TNI iha Indonézia no tuir planu tinan-ne’e iha na’in-rua mak sei ramata treinamentu iha Akademia TNI Angkatan Darat no ida seluk husi Angkatan Laut.
“Ha’u espera katak kooperasaun ohin ne’e ba oin ita sei aumenta membru sira husi F-FDTL ba iha Akademia TNI iha Indonézia no ami mós sei rekomenda membru TNI mai iha Timor-Leste atu apreende hamutuk no sira sei foku liu ba treinamentu operasaun no simik nian iha Indonézia,” nia katak.
Jornalista : Natalino Costa
Editora : Julia Chatarina
