DILI, 23 Fevereiru 2026 (TATOLI)-Diretór Servisu Apoiu Diagnóstiku no Terapêutika HNGV, Vidal Lopes, informa husi 01 Janeiru to’o iha 23 Fevereiru ne’e, HNGV rejista kazu dengue hamutuk 824 no husi númeru ne’e ema na’in-14 mak mate.
“Husi loron 01 Janeiru mai to’o 23 Fevereiru ne’e, HNGV rejista pasiente dengue hamtutuk 824 no husi númeru ema na’in-14 mak mate,” lakon vida,” Vidal Lopes dehan, ba jornalista sira, iha nia kna’ar fatin HNGV, ohin.
“Pasiente balun sei baixa hela hamutuk na’in-111 no husi númeru ne’e ema-ne’ebé baixa iha HNGV hamutuk 54 no ospitál temporária iha kuarentena Tasi-Tolu hamutuk 56,” Vidal Lopes informa ba jornalista sira iha nia kna’ar fatin HNGV, Bidau, ohin.
Nia hatutan, pasiente sira-ne’e maiória husi Munisipiu Dili mak barak liu no tuir mai mak Munisipiu Ermera no Likisá.
Tuir nia, kazu dengue ne’ebe mak labele salva ne’e tanba sira-nia kondisaun mai ho grave no puramente la’ós dengue mak halo maibé afeta mós moras sira seluk, signifika tama ona faze kompleksu nian, nune’e tuir ona prosedimentu tratamentu halo hotu ona maibé la konsege salva.
Nia relata, kauza husi pasiente lakon vida ne’e la’ós tanba ai-moruk espesifiku laiha, maibé tanba lori tarde ba iha fasilidade saúde hodi hetan atendimentu.
Normalmente kazu dengue ne’e laiha ai-moruk espesifiku maibé só bele halo de’it bainhira intensivu hodi jere tratamentu primaria liuhusi terapia apoiu nian hodi hamenus sintoma sira, prevene dezidrasaun no oinsá jere nia komplikasaun sira hanesan administra Paracetamol no seluk tan inklui deskansa adekuadu.
“Buat ida dengue ne’e la’ós ai-moruk espesifiku laiha, ne’e sintomatik tratamentu, fluitmanajement, anaunser iha komobilidade sira seluk ita bele halo tratamentu espesifiku. Sintomatik tratamentu ho fluitmanajement de’it. Presiza platelet ruma ou plasma ruma mak ita foin halo transfunsaun, karik iha indikasaun ruma,” nia haktuir.
Kona-ba espasu iha HNGV seidauk iha mudansa signifikativu, tanba ne’e kontinua utiliza kuarentena Tasi-Tolu hodi sai alternativa, tanba to’o ohin loron pasiente moras dengue kontinua aumenta.
“Agora daudaun espasu ita bele jere hela, tanba ita-boot sira hatene HNGV enfrenta hela problema espasu atu admite pasiente baixa ne’e mak ita book hela Ospital temporária Tasi-Tolu. Tanba se ami sei bele hela karik iha ne’e de’it mais labele ona, tanba ne’e mak ami koordena hodi fó baixa balun iha ne’eba. Pasiente baixa iha Tasi-Tolu agora 56 no hori kalan 72, mais ohin dadeer médiku sira vizita, balun alta tiha ona,” nia dehan.
Jornalista : Felicidade Ximenes
Editór : Cancio Ximenes
