BOBONARU, 24 Fevereiru 2026 (TATOLI) – Polísia Nasionál Timor Leste (PNTL), liuhusi Diresaun Nasionál Polisiamentu Komunitáriu koopera ho The Asia Foundation disponibiliza formasaun ba membru Konsellu Polisiamentu Komunitáriu 42 (KPK) iha suku Lahomea, postu administrativu Maliana, munisípiu Bobonaru.
Formasaun ne’e ho objetivu atu forma KPK hodi apoia serbisu autoridade seguransa atu redús krime ne’ebeé akontese iha suku no garante establidade ba komunidade.
Komandante Polísia Munisípiu Bobonaru, Superintendente Xefe Agustinho Gomes da silva, dehan formasaun ne’e atu kapasita membru KPK suku ho vizaun no misaun mak hametin relasaun entre polisia no komunidade, tanba PNTL adota prinsipiu polísia prosimidade ba komunidade.
Tuir nia, establesimentu KPK importante atu ajuda autoridade seguransa garante pás no orden públika iha suku no aldeia.
Nia esplika katak misaun KPK nia atu hato’o informasaun ba autoridade seguransa relasiona ho asuntu ne’ebé konsidera iha potensialidade ba ameasa seguransa no krime. Aleinde ne’e, hamutuk ho autoridade seguransa identifika no rezolve problema iha nivel suku.
Notísia relevante: Autoridade Afaloikai husu Komjer PNTL oferese formasaun ba membru KPK
“Responsablidade seguransa ne’e la’ós sai asuntu úniku ba PNTL. Ne’e resposablidade parte hotu nia, inklui komunidade, tanba PNTL nia prinsípiu mak PNTL mak komunidade no komunidade mak PNTL. Servisu PNTL sei la susesu kuandu la hetan apoiu husi komunidade”, nia hateten iha sede suku Lahomea, ohin.
Komandante ne’e fiar katak liuhusi formasaun ne’e membru KPK sira bele apoia serbisu autoridade polisiál hodi garante seguransa no orden públika iha suku no aldeia, nune’e komunidade bele moris ho hakmatek.
“Ita lakohi kalan ema toba la dukur, tanba iha ema ida ba tuda ema nia uma, ba hafuhu iha ema nia uma, lori motór gás iha estrada laran, perturba ema nia mentalidade. Ita lakohi ida-ne’e, entaun ita sira ne’e mak tenke hamutuk hodi mellora ida-ne’e, muda ema nia atitude, mentalidade”, nia afirma.
Xefe Suku Lahomea, Cirilo Mau Leto, konsidera formasaun ne’e importante tanba delegadu no delegada aldeia barak mak foun, seidauk koñese lala’ok no misaun KPK nia.
Nia dehan durante ne’e, Konsellu Suku Lahomea hala’o hela serbisu KPK nian, maibé tuir nia, atu maksimiza liután, Komandu PNTL tenke tun direta bá halo sensibilizasaun iha baze. “Atu hatene tuir fulan ida-ne’e ita iha problema saida? Se problema iha karik nia fukun ne’e husi ne’ebé? Para ita bele rezolve hamutuk”, dehan.
Xefe Suku Lahomea husu ba Komandu Jerál PNTL no parseiru sira atu apoia atributu ba membru KPK sira, nune’e bele hala’o serbisu ho di’ak iha terrenu.
Notísia relevante: Membru KPK 105 ajuda garante estabilidade iha Lolotoe
Jornalista: Sergio da Cruz
Editora: Maria Auxiliadora
