VIKEKE, 04 Agostu 2025 (TATOLI)—Xefe Suku Afaloikai, Postu Administrativu Uatulari, Munisípiu Vikeke, Cesario N. Pires solisita Komandante Jerál (Komjer) Polísia Nasionál Timor-Leste (PNTL), Henrique da Costa oferese formasaun ba membru Konsellu Polísiamentu Komunitáriu (KPK) Suku Afaloikai hodi apoiu servisu membru PNTL sira.
“Ha’u hakarak rekomenda ba Komandante Jerál Polísia Nasionál Timor-Leste (PNTL) oferese fomasaun kona-ba KPK nian ba ami, tanba ami Konsellu Suku Afaloikai preparadu ona, maibé seidauk hetan formasaun no toma pose,” Cesario hateten iha Suku Makadike de Cima, Postu Administrativu Uatulari, Segunda ne’e.
Autoridade ne’e subliña estabelesimentu KPK iha suku sai importante tanba bele ajuda hakalma situasaun sira-ne’ebé akontese iha suku no koopera ho parte PNTL tau-matan ba seguransa.
“Ha’u sente estabelesimentu KPK iha suku ne’e importante hodi kontrola komunidade, joven sira, atu labele kria problema,” nia hato’o.
Notísia relevante: PNTL Vikeke pose KPK iha Suku Makadiki atu apoia seguransa
Iha fatin hanesan, Xefe Suku Makadike Uaitame, José Pinto Soares reforsa katak Suku Makadike Uaitame nu’udár suku foun ne’ebé foin eziste no dook husi Eskuadra PNTL Uatulari, nune’e presiza estabelese KPK iha suku hodi apoiu ba seguransa.
Hatán ba preokupasaun ne’e, Komandante Jerál Polísia Nasionál Timor-Leste (PNTL), Henrique da Costa informa katak kona-ba estabelesimentu KPK no formasaun ba KPK sira sei koordena ho Unidade Polísiamentu Komunitária hodi oferese formasaun ba KPK sira.
“Ha’u fila bá Dili sei koordena ho Unidade Polísiamentu Komunitária hodi organiza atividade formasaun ba membru KPK sira liuliu ba suku sira-ne’ebé mak seidauk seidauk hetan formasaun,” nia promete.
Jornalista: Vitorino Lopez da Costa
Editór: Xisto Freitas da Piedade
