DILI, 24 Fevereiru 2026 (TATOLI)—Ekipa Karketu Dili Football Club (FC) hakat bá finál Tasa Liga Federasaun Futeból Timor-Leste (FFTL) 2025 hafoin susesu lolo Assalam ho skor 3-1 iha Estádiu Munisipál Dili, Segunda (23/02/2026).
Ekipa rua hala’o jogu kontinuasaun hafoin akontese inundasaun bainhira udan ho intensivu maka’as iha Estádiu Munisipál Dili, Domingu (22/02/2026) iha-ne’ebé jogu volta daruak paradu iha minutu 34 parte dahuluk ho skor 1-1.
Iha jogu referidu, Karketu Dili FC inisia uluk atake hodi rezulta golu iha minutu 35 liuhusi jogadór Ola Elipio ne’ebé muda tabela skor 2-1 no provoka jogu ho intensivu aas liután inklui animu husi adeptu sira iha tribun.
Assalam ne’ebé lakon ona golu halo atake no hatudu jogu ne’ebé kompetetivu kontra Matak Malirin maibé Ola Olipio sai eroi iha jogu referidu hafoin iha parte daruak prodús tan golu iha minutu 75 hodi halo esperansa Assalam FC atu hakat bá finál mihis ba bebeik.
Maski nune’e, Assalam konsege prodús golu iha minutu ikus 90+3 liuhusi jogadór Martinho Lopes maibé golu referidu labele salva elementu Adu Marques Namiruru husi derrota kontra Karketu Dili FC.
Ho rezultadu jogu entre ekipa rua, rezulta Karketu Dili FC hakat bá finál ho agregadu golu 4-2 iha-ne’ebé volta dahuluk ramata ho skor 1-1.
Entretantu, iha finál Karketu Dili FC sei kontra Emanuel FC ne’ebé antes ne’e gaña uluk billete hafoin manán Portu Taibessi ho agregadu golu 2-1 no tuir oráriu, finál sei realiza iha Estádiu Munisipál Dili, Sábadu (28/02/2026).
Jornalista: Natalino Belo
Editór: Xisto Freitas da Piedade
