DILI, 24 Fevereiru 2026 (TATOLI)-Parlamentu Nasionál liuhusi eleisaun sekreta iha plenária ohin hili Fernando Lopes de Carvalho (membru efetivu) no Mohammad Affandi Branco (suplente) hodi reprezenta órgaun lejizlativa ba iha membru Konsellu Majistradu Judisiál (KSMJ) ba períodu tinan haat.
Kandidatu na’in-rua ne’e aprezenta husi bankada Kongresu Nasionál Rekonstrusaun Timorense (CNRT, sigla portugés) no Partidu Demokrátiku (PD).
Deputadu sira ezerse direitu votu liuhusi eleisaun sekreta ho rezultadu votu a favór 42, kontra no abstensaun laiha, enkuantu deputadu husi bankada opozisaun FRETILIN no PLP auzente.
“Ita-nia kandidatu reprezentante iha Konsellu Superiór Majistratura Judisiál ohin mós meza sei elabora karta hodi haruka ba fali Konsellu Superiór tuir lei”, Prezidente Parlamentu Nasionál, Maria Fernanda Lay, dehan.
Tuir karta aseitasaun husi kandidatu nian ne’ebé lee sai iha plenária hato’o katak, atu sai membru ba KSMJ prontu halo responsabilidade serbisu ne’ebé tuir Konstituisaun no lei ne’ebé vigora.
Kandidatu sira iha méritu no esperiénsia iha área relevante, nune’e sei serbisu hamutuk ho membru konsellu sira seluk ho profisionál, imparsiál, independente no neutru tuir lei haruka.
Tuir Konstituisaun, iha artigu 128 (Konsellu Majistratura Judisiál nian) iha alínea 1 hateten, KSMJ nian, órgaun jestaun no dixiplina ida majistradu judisiál sira-nian, ne’ebé iha kompeténsia atu foti, hatún, muda no foti-sa’e juis sira.
Iha alínea 2, haktuir Juis Supremu Tribunál Justisa nian mak prezide KSMJ ne’ebé hola parte husi vogál sira tuirmai ne’e: a) Ida, Prezidente Repúblika mak hili, b) Ida, Parlamentu Nasionál mak hili, c) Ida, Governu mak hili, d) Ida, Majistradu Judisiál mak hili hosi sira leet.
Lembra katak, iha 14 Maiu 2025, Parlamentu Nasionál (PN), hili Silvério Pinto Baptista (membru efetivu), no Leonito Ribeiro (suplente) hodi reprezenta Parlamentu hanesan membru Konsellu Superiór Majistratura Judisiál ba restu mandatu.
Notísia relevante: Horta klarifika ezonerasaun Lukeno Alkatiri husi membru KSMJ
Jornalista: Nelson de Sousa
Editora: Maria Auxiliadora
