DILI, 14 Maiu 2025 (TATOLI)—Prezidente Repúblika, José Ramos Horta, klarifika motivu ezonera Lukeno Alkatiri husi membru Konsellu Superiór Majistratura Judisiária (KSMJ) tanba hakarak halo mudansa iha setór justisa.
Nia dehan, ema ida labele asumi kargu kle’ur liu, presiza halo mudansa nune’e instituisaun ne’e bele dinámiku liután.
“Sé mak hateten katak nia (Lukeno) Fretilin hateten ba, maibé ha’u hakarak oportunidade ida-ne’e tau ema foun timoroan no ema esperiente. Tanba ne’e mak muda. La’ós foinsa’e ne’e (Lukeno) laiha kompeténsia, lae. Nia jurista di’ak,” Horta hateten ba jornlista sira hafoin partisipa serimónia aniversária ezisténsia Polísia Sientífika Investigasaun Kriminál (PCIC-sigla portugés) ba dala XI ne’ebé hala’o iha salaun Multiozu Bebora, kuarta ne’e.
Lukenu Alkatiri nu’udár membru efetivu Konsellu Majistratura Judisiária reprezenta Prezidénsia Repúblika ba mandatu tinan haat (2022-2026) tuir Estatutu Majistradu Judisiáriu.
Lukeno Alkatiri hateten, iha tinan 2022, ho onra boot hetan nomeasaun hosi Prezidente Repúblika, nu’udár Membru Konsellu Superiór Judisiáriu (CSMJ-sigla portugés), ne’ebé ninia mandatu iha 2026 foin atu ramata.
“Ohin, bainhira hatene kona-ba públikasaun iha Jornál Repúblika kona-ba nomeasaun hosi Prezidente Repúblika atuál ba membru foun no respetivu suplente ba CSMJ, mezmuke ha’u la hetan komunikasaun ruma relasiona ho ha’u nia ezonerasaun formál, ha’u komprende intensaun implísita hosi asaun ida-ne’e. Tanba ne’e, no maski loloos sei iha tinan ida tan iha ha’u-nia mandatu, ha’u foti ona desizaun atu tun hosi ha’u nia pozisaun-desizaun ida-ne’ebé mak ha’u komunika ona ba Prezidente Repúblika,” Lukeno hateten iha nia komunikadu ne’ebé Tatoli asesu, kuarta ne’e.
Tuir nia, serbí ba Konsellu Superiór Majistratura Judisiária Timor-Leste nian sai hanesan onra ida ne’ebé boot iha vida profisionál.
“Ida-ne’e hanesan previléjiu ida atu serbisu ba Tribunál sira, majistradu judisiál sira, ofisiál tribunál sira no ema hotu ne’ebé mak asegura funsionamentu justisa nian loron-loron,” nia esklarese.
Nia dehan, sai hanesan membru KSMJ mós hanesan onra ida atu fahe misaun ida-ne’e ho membru sira seluk Konsellu nian.
“Ha’u sempre hala’o ha’u-nia kna’ar ho profisionalizmu, imparsialidade no integridade, hodi buka beibeik kontribui ba fortalesimentu majistratura, dignifikasaun ba kondisaun serbisu nian iha tribunál sira no valorizasaun ba tribunál nia profisionál sira hotu,” Lukeno subliña.
Jornalista: Natalino Costa
Editór: Xisto Freitas da Piedade
