DILI, 25 Fevereiru 2025 (TATOLI)—Ministériu Saúde (MS), ohin realiza semináriu Nasionál kona-ba implementasaun Planu Estratéjiku Nasionál Servisu Hospitalár ka Implementation of National Strategic Plan for Hospital Service 2025-2030.
Vise Ministru ba Operasionalisazaun Hospitalár, Flávio Brandão, hateten objetivu husi semináriu ida-ne’e oinsá halo diskusaun hodi implementa planu estratéjiku hitu (7) ne’ebé implementa iha diresaun nasionál ospitál, liuliu Ministériu Saúde (MS) sei implementa planu Governasaun Kliniku no Governasaun Hospitalár.
“Ita iha planu estratejiku hitu maibé ba tinan 2026 Ministériu Saúde sei implementa planu rua de’it mak planu ida mak Governasaun kliniku no ida mak governasaun hospitalár,” Flavio Brandão ba jornalista sira iha Hotel Novo Turismo, ohin.
Nia informa, foku ba planu estratéjiku hospitalár ne’e tanba tenke ajusta ba rekusu umanu ba ospitál rejionál sira hodi nune’e bele hala’o funsionamentu ba kuidadu saúde tersiária iha ospitál rejionál haat ne’e.
“Rekursu iha ospitál rejionál no funsionamentu sira-nia servisu ba kuidadu sekundáiu mak funsionamentu tenke la’o ho di’ak no haforsa kuidadu sekundária nian la’o ba oin,” nia dehan.
Nia hatutan, sei kontinua apoia rekursu umanu ba iha Hospital Nacional Guido Valadares (HNGV), hodi halo funsionamentu servisu kuidadu saúde sekundária ho di’ak liután.
Iha fatin hanesan, Diretor-Jeral Hospitalár, Raimundo do Santos, hateten objetivu husi semináriu ida-ne’e atu ko’alia kona-ba planu estratéjiku ospitál nian, nune’e Diretór sira bele uza planu ne’e atu define área prioridade sira ba oin.
Husi semináriu ida-ne’e mós, sei ko’alia kona-ba indikadór ospitál nian atu define prosesu servisu ne’ebé halo ona nomós ko’alia kona-ba planu estratéjiku ospitál nian ba oin,” nia dehan.
Jornalista : Felicidade Ximenes
Editór : Cancio Ximenes
