DILI, 25 Fevereiru 2026 (TATOLI)-Deputada husi Partidu Kongresu Nasionál Rekonstrusaun Timorense (CNRT, sigla portugés), CedelÍzia Faria dos Santos, husu ba Governu atu prezerva tais nu’udar identidade nasionál.
Nia apresia ho inisiativa Governu nian hodi aprezenta ona rezolusaun ida promove tais hodi orienta ba entidade públika no funsionáriu hotu atu utiliza vestuáriu tais kada semana no selebrasaun loron nasionál sira.
Tuir nia, tais Timor-Leste reprezenta patrimóniu kulturál boot no hetan rekoñesimentu hanesan patrimóniu kulturál husi UNESCO.
“Rezolusaun ne’e loke pasu pozitivu ba promosaun, valorizasaun, no prezervasaun uzu tais hanesan símbolu ita-nia identidade nasionál”, nia hato’o iha reuniaun plenária Parlamentu, ohin.
Nia solisita ba Governu fó atensaun espesiál bainhira implementasaun iha medida ne’e, liuliu kontrola tais imprime sira fa’an iha merkadu. Nune’e, valoriza prosesu produsaun artezenál no lokál ba produtór prinsipál mantein valór kulturál istóriku no valoriza soru-na’in sira.
Vise-Ministru ba Asuntu Parlamentár, Adérito Hugo da Costa, hateten kona-ba utilizasaun tais tuir akordu rezolusaun Governu ne’ebé aprezenta ona iha semana hirak liubá katak iha isár bandeira Primeiru-Ministru, Xanana Gusmão, fó ona atensaun no orientasaun ba entidade hotu atu konsidera rezolusaun ne’e iha implementasaun.
Notisia relevante: https://tatoli.tl/2025/12/10/seak-mci-sei-halo-regulamentu-atu-kontrola-produsaun-tais-imprime-iha-tl/
Jornalista: Nelson de Sousa
Editora: Maria Auxiliadora
