DILI, 10 Dezembru 2025 (TATOLI)—Governu liuhusi Ministériu Juventude Desportu Arte no Kultura (MJDAK) liuhusi Sekretáriu Estadu Arte no Kultura, sei servisu interministeriál ho Ministériu Komérsiu Indústria atu kria regulamentu hodi kontrola utilizasaun tais imprime ne’ebé prodús no faan iha merkadu Timor-Leste.
Notísia Relevante: SEAK prepara dekretu kona-ba utilizasaun tais iha instituisaun Estadu
Iha reuniaun Konsellu Ministru (KM), kuarta ne’e, Ministériu Juventude Desportu Arte no Kultura halo aprezentasaun proposta regulamentu ba utilizasaun tais imprime.
Sekretáriu Estadu Arte no Kultura, Jorge Soares Cristovão, relata regulamentu ne’e la’ós ba instituisaun Estadu maibé mós ba públiku, entaun husi rezolusaun ne’e rasik fó kompeténsia ba Sekretária Arte Kultura no Ministériu Komérsiu Indústria atu kria servisu interministeriál atu regula tais imprime sira-ne’ebé faan iha merkadu no loja.
“Ami mós husu atu iha selebrasaun loron nasionál sira tenke uza vestúáriu tradionál no kada semana atu funsionáriu sira uza atributu tais iha oras servisu nian hanesa kazaku,” Sekretáriu Estadu ne’e informa ba jornalista sira iha Palásiu Governu, ohin.
Regulamentu ne’e sei iha sansaun, entaun ida-ne’e mak Governu sei haree hela atu kontrolu sasán sira-ne’e, hanesan iha loja Xina nian balun ne’e faan tais imprime sira-ne’ebé mak la’ós tais orijen Timor nian.
Tuir komunikadu imprensa ne’ebé Ajénsia Tatoli asesu katak, ho objetivu atu reforsa valorizasaun ba elementu sentrál ida-ne’e husi identidade kulturál imateriál timoroan nian, ne’ebé rekoñese husi UNESCO no iha abut ne’ebé metin iha rituál komunitáriu sira, nune’e mós iha atividade ekonómika no sosiál nasaun nian.
Diploma ne’e determina katak órgaun no servisu administrasaun públika sira promove uzu tais iha loron servisu dahuluk kada fulan, no enkoraja dirijente no xefe sira atu uza vestuáriu ne’e iha aktu ofisiál no serimónia públika sira.
Tanba ne’e, Governu mós apela ba sosiedade sivíl no setór privadu sira atu hamutuk no enkoraja sira-nia funsionáriu sira atu uza tais semana ida dala ida, hodi kontribui ba nia prezervasaun no divulgasaun.
Enkuantu rezolusaun ne’e prevee mós kriasaun komisaun multidisiplinár ida hodi dezenvolve rejime sertifikasaun no autentisidade ba tais, nune’e mós rekualifikasaun ba merkadu tais nian iha Dili, hodi bele valoriza artezanatu sira-nia serbisu no reforsa potensiál kulturál no turístiku espasu ida-ne’e nian.
Notísia Relevante: Sertifikasaun tais importante atu mantein orijinalidade
Jornalista : Alexandra da Costa
Editór : Cancio Ximenes
