DILI, 29 Abríl 2025 (TATOLI)-Sekretáriu Estadu Arte no Kultura (SEAK), Jorge Soares Cristovão, hatete ninia parte prepara hela dekretu ida kona-ba utilizasaun tais iha instituisaun Estadu sira ba Konsellu Ministru (KM), nune’e hodi hatudu hanesan identidade Timor-Leste nian.
“Ami elabora ona dekretu ka rezolusaun ida hodi lori ba Konsellu Ministru, oinsá Governu bele konsidera ita-nia tais nu’udar identidade ida-ne’ebé instituisaun Estadu uza hodi halo servisu. Pelumenus semana-ida bele uza dala-rua, nune’e nafatin la’o konservasaun no prezervasaun”, SEAK dehan ba jornalista sira iha Delta Nova, ohin.
Tanba ne’e SEAK hahú ona preparasaun polítika lori patrimóniu kulturál imateriál ba Konsellu Ministru, nune’e bele garante lejimitidade hodi bele halo servisu ho di’ak.
“Tanba PKI (Patrimónia Kultura Imateriál) durante ne’e moris ho diploma ministeriál. Nune’e ita esforsu oinsá reforsa PKI nia servisu mak tenke iha dekretu ida, nune’e bele servisu ho parseiru sira hotu”, nia dehan.
Nia afirma presiza duni dekretu tanba antes ne’e Parlamentu Nasionál aprova ona loron nasionál tais iha 14 Dezembru.
Notísia relevante: Tais nu’udar patrimóniu kulturál importante atu salvaguarda
Jornalista : Osória Marques
Editora : Rita Almeida
