BOBONARU, 25 Fevereiru 2026 (TATOLI)-Empreza internasionál PT. Minarta Dutahutama, halo ona serbisu iha terrenu hodi normaliza kanál irrigasaun Maliana I ne’ebé hetan danus ne’ebé kauza husi rai-halai hafoin akontese udan-boot foin lalais ne’e.
Tuir informasaun ne’ebé Tatoli rekolla iha terenu, empreza halo normalizasaun emerjénsia de’it ba kanál primáriu metru 50 ne’ebé nakfera, nune’e bele fornese hikas bee ba natar hodi fasilita agrikultór sira halo kultivu ba hare époka dahuluk 2026.
Natar-na’in iha Maliana, Domingos Belo, apresia ho esforsu Governu no fiar katak serbisu ne’e bele finaliza iha tempu badak.
Notísia relevante: MAPPF sei reabilita ponte kanál irrigasaun Maliana I
“Agora udan-been sei di’a, balun bele kuda hare. Sira bee laiha ne’e agora sei hein hela bee irrigasaun ne’e mai mak kuda hare, tanba durante ne’e bee-maran. Agora ema hadi’a ona ne’e semana ida-ne’e nia rohan bee mai tan di’ak ona, se la’e hare oan boot hotu ona, ami fokit la di’ak”, nia informa ba Tatoli, iha Ramaskora.
Natar-na’in Belina de Jesus Soares husu ba Ministériu Agrikultura, Pekuária, Peska, no Floresta atu tau orsamentu hodi bele halo reabilitasaun ba irrigasaun ne’e.
“Ida agora ne’e halo sementara para bee bele tama mai de’it, halo mós mendadak loos, ita lahatene nia bele dura ka la’e, tanba rai iha okos ne’e mamar hela”, dehan.
Atu asegura irrigasaun ne’e labele kontinua hetan danus iha futuru, nia rekomenda ba MAPPF atu kuda ai-oan hodi proteje estrutura rai.
PT. Minarta halo normalizasaun ne’e bazeia ba orientasaun husi Ministru Agrikultura, Pekuária, Peska no Floresta, Marcos da Cruz.
Irrigasaun Maliana I reabilita husi parseiru internasionál JICA entre tinan 2008 no 2009 no obra ne’e hanesan ajuda husi povu Japaun nudar sinál amizade no kooperasaun entre Japaun no Timor-Leste.
Tuir dadus ne’ebé Tatoli asesu, irrigasaun Maliana I ne’e fornese bee ba natar hamutuk ekatre 1.050 partense ba suku Lahomea, Raifun, Odomau no Ritabou.
Notísia relevante: MAPPF orienta PT. Minarta normaliza irrigasaun Maliana I
Jornalista: Sergio da Cruz
Editora: Maria Auxiliadora
