DILI, 26 Fevereiru 2026 (TATOLI)–Diresaun Nasionál Transporte no Terrestre (DNTT) no Diresaun Tránzito Seguransa Rodoviária hasai ona sirkulár hodi husu ba loja sira ne’ebé seidauk iha fatin estasionamentu, atu rekruta ofisiál parajen sira hodi bele organiza parajen iha loja oin sira iha kapitál Dili.
Diretora DNTT, Maria Antónia Vitor da Costa, esplika, sirkulár ne’ebe mak fó sai ona, bazeia ba rezultadu enkontru ne’ebé PNTL parte Tránzitu no DNTT hala’o ho loja-na’in sira iha loron 15 Abril tinan kotuk, liga ho loja sira ne’ebé mak laiha estasionamentu.
“Sirkular ida-ne’e ita fo sai ona, loos duni katak loja sira balun sira rekruta tiha ona ofisiál, maibé tuir monotorizasaun DNTT nian katak seidauk másimu, entaun ita hasai sirkular ida foun filafali ba loja sira ne’e hotu atu nune’e sira ne’ebé mak iha ona ofisiál parajen bele organiza parajen iha sira-nia loja oin,” Diretora hato’o ba Jornalista sira iha ninia knaar fatin, Balide, Kinta ne’e.
Notísia relevante : Motorista sira tenke tula no hatún pasajeiru iha parajen públika – DNTT
Sirkulár ne’e fó sai ho prazu fulan-ida ba loja sira atubele rekruta ofisiál parajen sira.
“Ita haree katak, loja barak mak laiha fatin estasionamentu própriu, entaun ita hasai sirkulár ne’e atu sira bele kumpre, nune’e organiza parajen iha sira idaidak nia loja oin,” nia akresenta.
Biban ne’e, Diretora refere ba loja sira iha parte Audian ne’ebé laiha estasionamentu, dalaruma bainhira kompradór sira bá sosa sasán, para veíkulu iha estrada ninin no ikus mai mosu engarafamentu iha loja oin.
“Ita husu ba loja-na’in sira, ho sirkulár ne’ebé ita hasai bele organiza ka estabelese fatin parajen, bainhira sira laiha ona fatin sira bele organiza atu nune’e veíkulu sira bele para iha loja nia oin. Ezemplu hanesan SEARA nia oin no loja balun iha Audian, atu sira bele rekruta ofisiál atu nune’e sira bele organiza parajen,” nia relata.
Nia mós husu ba kompradór sira bainhira halo kompra iha loja oin sira ne’ebé identifika laiha parajen atu labele para loja oin, tanba sira la estabelese fatin parajen.
“Iha sansaun ba loja-na’in sira bainhira kontra orden husi Autoridade ne’ebé fó sai Dekretu Lei Kódigu Estrada, ita bele fó sansaun ba loja-na’in sira ne’ebé la kumpre orden husi Autoridade. Sansaun kontra orden Autoridade sei aplika multa $45,” nia katak.
Objetivu husi sirkulár ne’e atu husu loja-na’in sira atu rekruta ofisiál parajen iha loja oin sira, nune’e bele organiza motór ka kareta ne’ebé mak atu halo kompra.
“Ami kontinua monotoriza, depois sirkulár ne’e sai ami seidauk simu difikuldade ruma, ba loja sira ne’ebé seidauk iha ofisiál parajen, ami nafatin fó hanoin ba sira, nune’e lalais ona rekruta ona ofisiál parajen,” Diretora fó hanoin.
Nia hatutan : “Loja barak mak iha ona ofisiál parajen, hanesan iha Hudi Laran ne’ebá, maibé tuir monotorizasaun DNTT nian seidauk organiza ho másimu, entaun ho sirkulár ida fó sai atu sira organiza ho másimu.”
Iha fatin seluk, Diretór Tranzitu Seguransa Rodoviária, Superientendente Xefe Polísia, Antoninho Mau Luta, fundamenta katak, antes ne’e halo ona avizu, maibé loja balun la kumpre, tanba ne’e mak hasai tan sirkulár.
“Ba oin ami sei serbisu hamutuk halo atuasaun iha terrenu, bainhira sira la kumpre karik, ami sei halo atuasaun nomós prega multa ba loja sira ida-idak,” nia katak.
Sirkular ne’ebé fó sai asina direita husi Diretora DNTT no DTSR hodi publika sai ona ba públiku.
“Ita mós sei halo enkontru para prepara didi’ak planu, maibé balun ita orienta daudaun ona ba terrenu para hare loja sira la kumpre sira halo daudaun. Maibé kona-ba operasaun konjunta sei prepara no koordena ho DNTT. Ita-nia operasaun konjunta ne’e sei halai liu ba loja-na’in sira nomós karreta no motór labele para arbiru, tenke haree tuir riska ne’e, entaun ita aplika no avizu mós la’o daudaun,” Diretór esplika.
Nia husu ba loja sira ne’ebé to’o agora seidauk iha ofisiál parajen tenki prepara tanba hafoin avizu ne’e sai, ba oin sei halo operasaun konjunta hodi haree ninia komprimentu.
Jornalista : Natalino Costa
Editora : Julia Chatarina
