DILI, 26 Fevereiru 2026 (TATOLI)—Ekipa Karketu Dili Football Club (FC) sei prepara estratéjia hodi hamate atake Emanuel FC bainhira ekipa rua kontra malu iha finál Tasa Liga Federasaun Futeból Timor-Leste (FFTL) 2025.
Treinadór Karketu Dili FC, Bernard Teye esplika sei la foku ba kada jogadór husi Emanuel FC maibé konsidera adversáriu nu’udár ekipa forte no nakonu ho talentu no kualidade hahú husi treinadór, asistente inklui jogadór hotu iha-ne’ebé rezulta hakat to’o finál.
“Lalika prekupa. Kalma de’it. Ita sei haree rezultadu. Futeból buat hotu atrativu no fásil,” Bernard Teye hateten iha Estádiu Munisipál Dili, Kinta (26/02/2026).
Teye relata, ninia ekipa preparada hahú husi jestór to’o jogadór ne’ebé ho kondisaun di’ak liuliu tanba iha mentalidade kampiaun maski istória hatudu iha primeira divizaun Liga Futeból Timor-Timor-Leste époka 2025 Karketu impata ho Emanuel.
Teye hateten maski la fásil hakat to’o finál maibé nafatin kompromete sei hatudu jogu kompetitivu bainhira kontra Emanuel iha finál no gaña vitória hodi foti tasa ba dahuluk ne’ebé sei realiza iha Estádiu Munisipál Dili, Sábadu (28/02/2026).
“Ami sei manán. Ami sei foti tasa no ami sei sai kampiaun,” Teye promete.
Entretantu, ekipa Matak Malirin iha Tasa Liga FFTL sai kampiaun Grupu D hamutuk ho ekipa eliminadu rua seluk Santa Cruz no As Marca iha-ne’ebé antes hakat bá finál susesu manán Assalam iha meiu finál ho agregadu golu 4-2.
Jornalista: Natalino Belo
Editór: Xisto Freitas da Piedade
