DILI, 26 Fevereiru 2026 (TATOLI)—Komisaun Rekrutamentu ba Estabelesimentu Supremu Tribunál Justisa propoin ona ba Governu atu komunika ba Konsellu Superiór Majistratura Judisiária (KSMJ) Portugal atubele haruka sira-nia ema mai Timor-Leste sai hanesan juri ba rekrutamentu Juíz sira ne’ebé sei tuur iha Supremu Tribunál.
“Komisaun hanoin ona atu manda karta iha semana ida-ne’e ba Konsellu Majistratura Portugal, através ita-nia Autoridade iha Timor husi ita-nia Primeiru Ministru no Ministru Justisa,” Komisáriu Rekrutamentu ba Estabelesimentu Supremu Tribunál Justisa, José Pedro Comões, hato’o ba Jornalista sira iha Tribunál Judisiál Primeira Instánsia Dili, Kaikoli, Sesta ne’e.
Nia dehan, objetitu husi manda karta ba Konsellu Superiór Majistratura Judisiária Portugal ne’e atu Governu Timor-Leste iha kontaktu ho Portugal, atu autoriza juíz kualifikadu bele sai juri iha prosesu rekrutamentu.
“Kuandu envia ona, iha ona komunikasaun ho parte Governu, Komisaun Rekrutamentu mós hanoin ona iha posibilidade atu bá Portugal. Ami Komisáriu na’in-tolu bele ko’alia ho Konsellu Superiór Portugal atu sira fó kandidatu di’ak atu sai juri hodi mai halo serbisu ezame teste avaliasaun ba ita-nia kandidatu timoroan,” nia akresenta.
Notísia relevante : Avelino Coelho relata progresu rekrutamentu Juiz STJ ba Xefe Estadu
Bainhira Konsellu Superiór Majistratura Portugal disponível ona hodi haruka sira-nia juíz ne’ebé kualifikadu mai sai juri, entaun Fulan-Marsu nia laran Komisaun sei anúnsia ba públiku kona-ba rekrutamentu juíz timoroan ne’ebé atu tuur iha Supremu Tribunál.
“Ha’u espera iha Fulan-Marsu ne’e bele halo prosesu vaga ba rekrutamentu juíz no inísiu Abríl ita bele iha juíz timoroan ne’ebé the best of the best atu tuur iha Supremu Tribunál Justisa ba aban bainrua nian,” nia akresenta.
Juri ba rekrutamentu ne’e ema na’in-tolu ka bele liu tanba tenke sura ho tékniku sira ne’ebé apoiu juri no komisaun nia serbisu.
Juíz sira ne’ebé atu tuur iha Supremu Tribunál Justisa ne’e juíz juvialiadu ka juíz sira ne’ebé serbisu liu tinan 25 ona.
“Atu hetan ida-ne’e la fasil, tanba ne’e Komisaun Rekrutamentu mós envia karta ba Primeiru-Ministru, Ministru Justisa no parte Tribunál atu ko’alia ho Konsellu Superiór Majistratura Judisiária atu sira autoriza juíz sira bele konkorre iha vaga rekrutamentu juíz Supremu Tribunál no kuandu aban bainrua iha rekrutamentu ne’e mak iha dokumentu balun husi juíz sira timoroan ne’ebé konkorre vaga mak iha divida, Komisaun bele komunika ho Konsellu atu husu konfirmasaun ba dokumentu juíz sira-nia,” nia katak.
Komisaun sei halo ina audiénsia ho Primeiru-Ministru no Ministru Justisa atu atualiza kona-ba Komisaun nia serbisu hahú husi Janeiru tinan ne’e to’o agora.
“Ami-nia audiénsia ho Primeiru-Ministru Xanana Gusmão sei akontese iha loron 02 Marsu dadeer, ne’e konfirmadu ona, Ministru Justisa no Konsellu Superiór mak seidauk konfirma,” nia relata.
Komisaun konklui ona serbisu balun hanesan aprova ona regulamentu internu ba Komisaun, manuál ba juri depois matéria halo avaliasaun valór ba juíz sira.
“Ne’e mak dokumentu sira ne’ebé Komisaun aprova. Ita bele dehan inísiu Abríl ne’e vaga bele loke ona. Kandidatu sira bele hatama ona dokumentu. Juri bele halo ona avaliasaun ba dokumentu sira hotu, loos hotu sei tama ezame, kuandu Abríl ita hahú, signifika Maiu ita iha ona kandidatu juíz timoroan,” nia katak.
Jornalista : Natalino Costa
Editora : Julia Chatarina
