KOVALIMA, 26 Fevereiru 2026 (TATOLI)- Prezidente Autoridade Munisípiu (PAM), Kovalima husu ba xefe Suku atu kontrola joven-sira iha suku Debos, postu administrativu Suai , Munisípiu Kovalima.
“Ha’u husu ba xefe Suku sira atu kontrola Joven sira relasiona joven sira halo barullu toka múzika iha tempu kalan, nune’e halo komunidade sira deskansa la diak,” Prezidente Autoridade Munisípiu Kovalima, Miguel Armada Cardoso, hato’o liuhusi nia diskursu iha AMC.
Ho nune’e autoridade Kovalima fó hanoin ba xefe Suku sira atu kontrola joven-sira ne’ebé mak halo barrulu iha temp- kalan.
PAM ne’e dehan, bainhira joven-sira toka mùzika iha tempu kalan to’o 23:00 ne’e barrulu tanba halo ema seluk labele deskansa no labele estuda ho di’ak.
Iha sorin seluk, Xefe Suku Debos hanesan mós Prezidente KPK, Agostinho da Silva, esplika sei orienta ba membru KPK iha kada aldeia hodi kontrola joven-sira ne’ebé toka múzika iha tempu kalan.
“Relasiona ho preokupasaun Prezidente Autoridade Munisípiu Kovalima ha’u sei orienta ba ha’u nia xefe aldeia sira nu’udar mós membru KPK atu kontrola joven-sira iha bairru laran,” nia dehan.
Jornalista: Celestina Teles
Editór:Florencio Miranda Ximenes.
