DILI, 26 Fevereiru 2026 (TATOLI)-Banku Sentrál Timor-Leste (BCTL, sigla portugés) rejista, iha tinan kotuk, traballadór timoroan sira iha Korea Súl, Austrália, Irlanda, Reinu Unidu, no nasaun seluk haruka remesa ba família hamutuk millaun $188.
“Remesa ne’e ita-nia ema bá serbisu iha ema nia rai lori osan tama”, Governadór BCTL, Helder Lopes, esplika hafoin halo audiénsia públika ho Komisaun D ne’ebé trata Asuntu Ekonomia no Dezenvolvimentu iha Parlamentu Nasionál, ohin.
Remesa ne’e kompara ho tinan 2024 tun no dadus agregadu ne’e kaptura liuhusi instituisaun finanseira sira ne’ebé eziste. “Dalaruma mós ita-nia maluk sira hanesan Austrália nia mai Timór feriadu, lori osan fíziku iha bolsu, nune’e labele kaptura iha dadus, tanba nia la transfere husi sistema”, dehan.
Antes ne’e, Diretór Nasionál Empregu Estranjeiru iha Sekretária Estadu Formasaun Profisionál no Empregu (SEFOPE), João Correira Perreira, relata, iha tinan kotuk, traballadór timoroan iha Korea Súl no Austrália transfere millaun $15-resin mai Timor-Leste.
Nia dehan, remesa ne’e mai husi traballadór ba serbisu iha Austrália hamutuk 4.840 no Korea Súl 791.
Lembra katak, iha 2024, traballadór timoroan sira iha Korea Súl, Austrália, Irlanda, Reinu Unidu no seluk tan haruka ona osan millaun $244,8, ne’ebé reprezenta 14,5% husi Produtu Internu Brutu (PIB).
Remesa boot liu mak mai husi Reinu Unidu ho valór millaun $100, Austrália millaun $61, Korea Súl millaun $44,8 no millaun $39 husi nasaun sira seluk.
Notísia relevante: https://tatoli.tl/2026/01/15/traballador-timoroan-iha-australia-no-koreia-sul-haruka-osan-millaun-15-mai-tl/
Jornalista: Nelson de Sousa
Editora: Maria Auxiliadora
