DILI, 26 Fevereiru 2026 (TATOLI) – Sekretaria Estadu Komunikasaun Sosiál (SEKOMS) disponibiliza formasaun kona-ba prepara proposta no relatóriu ba jestór Rádiu Komunidade no pesoál administrasaun na’in-21 husi munisípiu hothotu.
Sekretáriu Estadu Komunikasaun Sosiál, Expedito Dias Ximenes, hateten formasaun durante loron rua, 26 no 27 Fevereiru, jestór rádiu komunidade sira bele hatene halo proposta no relatóriu, tanba dalabarak sira halo proposta hodi hetan osan husi Governu, maibé hafoin simu tiha la hatene halo relatóriu kona-ba uzu orsamentu Estadu ne’ebé SEKOMS apoia ba sira.
“Tinan ne’e, ita iha orsamentu hamutuk rihun $200 ne’ebé sei apoia ba rádiu komunidade. Entaun, formasaun ne’e fasilita sira hodi bele prepara sira-nia proposta, tanba ita apoia sira bazeia ba sira-nia proposta, maibé proposta ne’e mós tenke bazeia ba nesesidade ne’ebé presiza duni”, Expedito Dias Ximenes hateten, ohin.
Nia subliña rádiu komunidade sira ne’e harii husi komunidade rasik, la’ós husi Governu, maibé nafatin fó apoiu tanba interese povu nian no konsidera sira hanesan liña frente ba komunidade iha área rurál.
“Ha’u rekomenda favór halo proposta mai karik tuir nesesidade ne’ebé imi presiza. Ha’u espera formasaun loron rua ne’e bele fó benefísiu ba imi hodi implementa iha imi-nia fatin, tanba kada tinan Governu fó apoiu orsamentu liuhusi transferénsia públika ne’e la’ós atu uza tuir hakarak. Maibé, bazeia ba proposta ne’ebé mai, nune’e bainhira imi hetan tenke utiliza tuir proposta”, nia hato’o.
Jestór Rádiu Komunidade Maubisse Mauloco (RKMM), Joaquim de Fátima Coutinho, sujere katak formasaun loron rua ne’e seidauk sufisiente no presiza kontinua nune’e bele hakle’an koñesementu no kapasidade jestór radiu nian hodi utiliza orsamentu ne’ebé hetan.
Antese ne’e, sira partisipa ona formasaun kona-ba halo proposta no relatóriu, maibé mudansa governativa maka presiza nafatin formasaun hodi reforsa sira-nia koñesimentu sira.
RKMM rasik daudaun iha jornalista na’in-lima ne’ebé serbisu lorloron halo kobertura ba atividade komunidade iha munisípiu Ainaru.
Jornalista: Arminda Fonseca
Editora: Maria Auxiliadora
