AILEU, 26 Fevereiru 2026 (TATOLI)—Primeiru-Ministru (PM), Kay Rala Xanana Gusmão, enkoraja manorin sira iha Eskola Bázika Sentrál (EBC) das Flores Aileu-Vila, munisípiu Aileu atu hanorin estudante sira ho domin tanba sira mak futuru nasaun ne’e nian.
“Ha’u haree estudante sira ko’alia Lian Portugés kapaas loos, ida-ne’e duni. Kontente haree imi hanorin Portugés di’ak tebes ba estudante sira. Tanba ne’e, favór ida hanorin estudante sira ho domin tanba sira mak futuru nasaun ne’e nian. Lian Portugés ne’e importante tanba ita nu’udár membru CPLP no oras-ne’e daudaun ita asume hela Prezidénsia,” PM Xanana husu ba manorin sira bainhira hala’o vizita hodi haree direta kondisaun infraestrutura no prosesu aprendizajen iha EBC das Flores Aileu-Vila, kinta ne’e.
Xefe Governu rekoñese katak, problema boot iha sosiedade Timor mak edukasaun maibé ne’e responsabillidade sidadaun hotu nian.
Manorin no estudante sira haksolok tebes hodi simu Primeiru-Ministru iha eskola ne’e no transmite mensajen ne’ebé nakonu ho inspirasaun.
Akompaña Primeiru-Ministru iha vizita ne’e, Ministru Administrasaun Estatál (MAE), Tomás do Rosário Cabral, Ministra Saúde (MS), Elia dos Reis Amaral, Ministra Solidariedade Sosiál no Inkluzaun (MSSI), Verónica das Dores, Vise-Ministra Solidariedade Sosiál no Inkluzaun, Céu Brites no Prezidente Autoridade Munisípiu Aileu, João Bosco dos Santos.
Jornalista : Hortencio Sanchez
Editór : Cancio Ximenes
