DILI, 27 Fevereiru 2026 (TATOLI) – Komisaun C iha Parlamentu Nasionál halo fiskalizasaun ba edifísu Eletrisidade Timor-Leste, Empreza Públika (EDTL, E.P) hodi haree ezekusaun orsamentál no solisita atu aumenta kolesaun reseita sira.
Tanba instituisaun ida-ne’e hamriik hanesan empreza públika maka Komisaun haree katak tenke iha reseita rasik hodi bele kobre sira-nia despeza sira.
“Harii iha 2020, sira-nia reseita aumenta kada tinan dezde harii, maski ladún signifikante’’, Prezidente Komisaun C, Cedelízia Faria dos Santos, hateten.
Nune’e, Governu fó nafatin osan liuhusi transferénsia públika iha kada tinan ba EDTL ho alokasaun millaun $100-resin.
Durante tinan 2025, EDTL rekolla reseita millaun $85, ne’ebé finansia de’it ba saláriu no vensimentu, kapitál menór, maibé kapitál dezenvolvimentu no bens servisu, liuliu verba ba kombustivel nafatin husi orsamentu Estadu.
Iha fiskalizasaun ne’e, Komisaun husu atu EDTL kontrola komunidade ne’ebé uza koneksaun ilegál. Aleinde ne’e, preokupa ho sistema venda pulsa ne’ebé dalaruma avaria, maibé tanba liña internét maka husu atu toma atensaun no ba oin labele akontese tan.
Prezidente Komisaun Ezekutiva EDTL, Paulo da Silva, aprezenta ba Komisaun C ezekusaun orsamentu 2025, no programa no orsamentu 2026 nian.
Hodi relata katak entre 2022 no 2025 EDTL konsege arrekada reseita $265.354.173,39, liuhusi atividade inspesaun ilegál, pós-pagu no pré-pagu, ligasaun foun, dokumentu konkursu, inklui jurus husi banku.
Nia esplika mós planu no programa perioridade tinan ne’e mak kontinua mellora servisu eletrisidade, ba projetu kabu subterráneu iha Bidau, Kolmera-Rotunda Nicolau Lobato-Komoro no fatin seluk tan.
Hato’o mós servisu diversifikasaun fonte enérjia mak halo konstrusaun 72MW SPV iha Laleia – Manatutu, BEES 36MWh, konstrusaun 3MW SPV Ataúru BESS 3MWh, estudu viabilidade ba enérjia anin iha Oeleu-Bobonaru no Larigutu-Vikeke.
Relata mós finalizasaun projetu eletrifikasaun nível aldeia no bairu hamutuk 186, ho totál pakote 81, konstrusaun no instalasaun projetu eletrifikasaun pakote hamutuk 61.
Jornalista: Nelson de Sousa
Editora: Maria Auxiliadora
