Arco-Iris Timor-Leste realiza festivál aborda direitu no protesaun ema ho LBGTI iha sosiedade
DILI, 28 Fevereiru 2026 (TATOLI)–Organizasaun Arco-Iris Timor-Leste, Sábadu ne’e, realiza festivál ho tema “Istoria, Arte, Múzika ba Inkluzaun” hodi aborda kona-ba direitu no protesaun ba komunidade ema ho Lesbian, Bisexuál Gay, Transjender no Inter-Seksuál (LBGT) hodi labele hetan diskrimisaun iha sosiedade.
Koordenadór Festivál Arco-Iris Timor-Leste, Arnaldo Soares Fernandes, hateten, organizasaun ne’e hola inisiativa ida hodi aprosima prosesu advokasia ba direitu diversidade liuhusi arte.
“Hola parte importante ida oinsá atu influénsia sosiedade ba kestaun sira ne’ebé mak ita diskute liga ho direitu umanu. Ho ida-ne’e Arco-Iris Timor-Leste realiza festivál ida-ne’e ho mekanizmu advokasia ne’ebé ita draf múzika, arte no istória sai hanesan plataforma ida atu kontinua kampaña direitu umanu, liuliu ba direitu komunidade LBGTI,” Arnaldo hato’o iha nia intervensaun iha ámbitu diskusaun festivál Arco-Iris Timor-Leste ne’ebé hala’o iha Uma-Laku, Farol.
Nia dehan, festivál ne’e ho sesaun diskusaun, pintura arte no hahú diskusaun entre movimentu sosiál sira, komunidade, akademista sira no komunidade jornalizmu sira tanba hirak ne’e hola parte importante iha advokasia direitu ba ema LBGTI.
“Entaun inisiativa ida-ne’e liga ho movimentu sosiál sira ne’ebé bele akresenta direitu umanu iha Timor-Leste,” nia akresenta.
Notísia relevante : Komisaun A no Plan International diskute promove direitu EhD-LGBTI
Iha fatin hanesan, Prezidente Asosiasaun Jornalista Timor-Leste (AJTL), Zevónia Viera, konsidera mídia nu’udar parseiru inkluzivu ba entidade hotu hodi halo influénsia halo kampaña ba injustisa ba kestaun sira ne’ebé mak ukun-na’in sira seidauk responde.
“AJTL ho prinsípiu ida mak luta ba liberdade imprensa no liberdade espresaun, fó espasu ba grupu vunerável sira, marjenizadu sira atu ko’alia sira-nia direitu umanu, entaun mídia nia prespetiva no luta ba direitu umanu, kona-ba prinsípiu direitu umanu, entaun mídia mós tenke kompreende ida-ne’e AJTL tenta atu kapasita membru sira hamutuk 500-resin hodi halo advokasia ba direitu ema LBGTI sira hodi labele hetan diskrimisaun iha sosiedade,” nia akresenta.
Nune’e mós, membru Arco-Iris Timor-Leste, Ara Fonseca, hateten, organizasaun ne’e realiza atividade ho objetivu hodi ko’alia liu kona-ba komunidade LBGTI hetan respeitu.
Nia nota, dala barak LBGTI ne’e ladún hetan direitu protesaun iha sosiedade, tanba ne’e liuhusi atividade festivál sira mak atu fó advokasia ba komunidade sira katak labele halo diskrimisaun ba komunidade ne’e.
Durante organizasaun LBGTI Timor-Leste halo advokasia husi nasionál to’o munisípiu sira hodi fó hatene ba públiku katak presiza konsidera LBGTL nu’udar sosiedade inklusivu ida ne’ebé hetan respeita, entaun esforsu sira ne’e halo deskriminasaun ba komunidade ne’e menus.
Nune’e, Reprezentante LBGTI, Stefanio Amaral da Silva Salsina ‘KEN’ deskreve festivál ne’e importante tanba atu rona opiniaun husi komunidade ne’e no rona mós opiniaun husi ema seluk ba espresaun livre sira inklui rona istória moris husi maluk sira.
Nia haktuir, dala barak ema hetan dezafiu sira maibé hili lakohi ko’alia, tanba ne’e dala ruma liuhusi arte pintura sira bele espresa ema ida nia hanoin.
Jornalista : Natalino Costa
Editora : Julia Chatarina
