DILI, 28 Fevereiru 2026 (TATOLI) – Izraél lansa ona atake preventivu ida hasoru Iraun iha loron-sábadu, 28 Fevereiru ne’e hodi dudu Médiu Oriente ba iha konfrontu militár ida ne’ebé hafoun no hamenus liután esperansa sira ba solusaun diplomátika ida ba disputa nukleár Teeraun nian ne’ebé maka la’o kleur ona.
The New York Times, sita ofisiál norte-amerikanu ida, fó-sai katak atake norte-amerikanu sira hasoru Iraun hala’o hela.
Fonte ida hatete ba Reuters katak líder supremu Iraun nian, Ayatollah Ali Khamenei, la iha Teeraun no transfere ona ba fatin seguru ida. Atake ne’e, akontese hafoin Izraél no Iraun halo funu aéreu durante loron 12 iha fulan-Juñu, tuir alerta repetidu sira hosi EUA-Izraél katak sira sei ataka fali bainhira Iraun kontinua ho nia programa nukleár no misil balístiku sira.
Teheran prepara hela ba vingansa
Responsável iranianu ida hatete ba Reuters katak Teeraun prepara hela ba vingansa, ho resposta ne’ebé sei sai maka’as.
Atake “preventivu” koordenadu ho EUA Atake aparente dahuluk iha Izraél nia atake iha loron-matan hasoru Iraun akontese besik eskritóriu sira hosi Líder Supremu Ayatollah Ali Khamenei.
Fonte ida hatete ba Reuters katak líder supremu Iraun nian, Ayatollah Ali Khamenei, la iha Teeraun no transfere ona ba fatin seguru ida.
Ofisiál defeza israelita ida hatete katak operasaun ne’e planeia ona durante fulan barak nia laran iha koordenasaun ho Washington, no katak data lansamentu nian deside ona iha semana hirak liubá.
Ofisiál norte-amerikanu na’in rua hatete ba Reuters katak militár norte-amerikanu hahú atake oioin hasoru alvu sira iha Iraun. Ámbitu hosi operasaun aérea no tasi nian la klaru kedas.
Esplozaun sira iha Teeraun
Ohin dadeer rona esplozaun maka’as rua iha Teeraun hosi jornalista sira AFP nian, no haree suar maka’as rua iha sentru no leste hosi kapitál Iraun nian.
“Tipu esplozaun sira sujere katak ida-ne’e hanesan atake misil ida”, fó sai hosi ajénsia notisioza Fars, la fó-sai ho detalladu.
Ministériu Defeza Izraél nian fó-sai depois “atake preventivu” ida hasoru Iraun bainhira sirene sira lian iha Jeruzalén no ema sira iha nasaun tomak simu alerta sira liuhosi telefone kona-ba ameasa ida ne’ebé “grave tebes”.
“Estadu Izraél lansa ona atake preventivu ida hasoru Iraun. Ministru Defeza Izraél Katz deklara ona estadu emerjénsia espesiál no imediatu iha nasaun tomak”, fó-sai liuhusi nota imprensa ida.
