DILI, 28 Fevereiru 2026 (TATOLI)–Ministra Edukasaun, Dulce de Jesus Soares, klarifika, manorin ne’ebé rekrutadu husi programa Bolsa Kandidatu maibé seidauk hetan kolokasaun, tama lista espera ho durasaun tinan-rua tanba presiza nesesidade eskola mak bele koloka.
“Bolsa Kandidatu Ensinu Sekundáriu ne’e ita koloka ona 505 maibé seluk ne’ebé seidauk koloka ne’e nia durasaun iha Bolsa Kandidatu ne’e durante tinan-rua. Tanba dauduan Ensinu Báziku ne’ebé ita atu koloka halo iha tinan 2024. Agora iha tiha 2026 mak foin koloka,” Ministra Dulce informa ba Jornalista sira, iha salaun Zinájiu, Kolmera, Sábadu ne’e.
Notísia relevante : Manorin 1.143 ba Ensinu Báziku rekrutadu Bolsa Kandidatu simu pose
Governante ne’e esplika, natureza teste ba manorin Bolsa Kandidatu iha Ministériu Edukasaun (ME) la hanesan ho ministériu sira seluk. Maski pasa ona iha teste maibé sira hein iha bolsa ka lista espera nian.
“Bolsa kandidatu nia natureza ne’e la’ós teste ohin ita ba kolokasaun kedas, lae. Maibé preparadu iha bolsa bainhira Ministériu Edukasaun presiza bazeia ba nesesidade eskola ita bele koloka sira,” Ministra Dulce katak.
Totál profesór ne’ebé pasa 1.095 husi totál ema 8.779 ne’ebé konkorre vaga ba manorin iha Ensinu Sekundáriu.
“Ida-ne’e seidauk to’o alvu ne’ebé Ministériu Edukasaun presiza tanba totál vaga ne’ebé ita iha ne’e hamutuk 1.450, ita sei falta 355,” nia akresenta.
Tinan ne’e ekipa kuadru pesoál ME sei halo identifikasaun ba eskola ne’ebé mak presiza manorin hira.
“Hakarak lakohi ita sei kontinua halo rekrutamentu tanba reforma ne’e funsiona, entaun fulan-fulan mak ema ida ka rua idade atinje ona 65. Ida-ne’e ita sei bazeia ba lista husi Komisaun Funsaun Públika,” nia tenik.
Jornalista : Osória Marques
Editora : Julia Chatarina
