DILI, 02 Marsu 2026 (TATOLI)–Empreza Rics liuhusi nia Advogadu Privadu, José Pedro Camões, klarifika informasaun ne’ebé fó sai katak konstrusaun Uma Dignu iha área Tunubibi, paradu desde Setembru 2025.
José Pedro relata, konstrusaun obra ne’e kontinua la’o no daudaun atinje ona 50%.
“Ohin ha’u hetan delegasaun husi ha’u-nia kliente, hanesan na’in ba empreza Rics ne’ebé hetan fiar husi Governu atu konstrui Uma Dignu iha área Tunubibi, Suku Tapo-Memo, Postu Administrativu Maliana Vila, Munisípiu Bobonaru, katak tuir informasaun empreza halo 25 casas, kuaze 15 atu hotu ona, ba plafon no kakuluk 10-resin hotu ona. Empreza kontinua halo obra ne’e, ne’ebé projetu ne’e kontinua la’o,” Advogadu hato’o ba Ajénsia TATOLI iha Tribunál Judisiál Primeira Instánsia, Kaikoli, Segunda ne’e.
Nia dehan, parte Governu halo pagamentu lalais, enkuantu konstrusaun balun la’o atrazu. Antes ne’e Governu liuhusi Ministériu Dezenvolvimentu Rurál no Abitasaun Komunitária halo pagamentu 7%.
“Tanba iha buat ruma akontese iha dalan ne’ebé seidauk halo pagamentu mak la aselera tuir ita-nia hakarak. Empreza interresante atu klarifika ba públiku katak la’o, la’o didi’ak, la’o neneik ho nia dezafiu oin-oin, maibé la’o nafatin hela,” nia akresenta.
Notísia relevante : Konstrusaun Uma Dignu iha Tunubibi paradu dezde Setembru, benefisiáriu preokupa
Advogadu esplika, husi empreza Rics hatama ona pedidu ba Ministériu Dezenvolvimentu Rurál no Abitasaun Komunitária atu halo pagamentu 50% maibé seidauk halo pagamentu.
“Ami halo pedidu ba ministériu atu halo pagamentu 50% bazeia ba obra ne’ebé tuir dezeñu maibé to’o agora seidauk iha pagamentu, kuandu iha pagamentu tuir progresu ne’ebé iha, empreza garante sei entrega tuir tempu kontratu,” nia katak.
Aleinde ne’e, empreza husu ba ministériu relevante atu orienta tékniku sira hodi avalia projetu.
Tuir kontratu ne’ebé empreza Rics selebra ho Governu, katak obra ne’e sei konklui iha Maiu tinan ne’e, ho nune’e empreza la garante maibé kuandu iha prosesu pagamentu lalais bele to’o iha Maiu bele entrega ona.
“Pedidu pagamentu ami solisita ona ba ministériu, maibé seidauk iha feedback ruma, iha reuniaun de’it maibé ate agora seidauk to’o iha empreza atu halo pagamentu. Tanba ne’e notísia sira ne’ebé mak bele fó pontu negativu ba empreza, ami tenke halo klarifikasaun. Segundu kuandu iha ona pagamentu empreza sei konklui obra ne’e tuir data ne’ebé termina,” nia katak.
Jornalista : Natalino Costa
Editora : Julia Chatarina
