BOBONARU, 23 Fevereiru 2026 (TATOLI) – Benefisiáriu ba Programa Uma Dignu, Manuel Leite, lamenta ho konstrusaun uma ne’ebé paradu dezde fulan-Setembru tinan kotuk.
Manuel Leite ne’ebé hela iha aldeia Tunibibi, suku Tapo-Memo, iha postu administrativu Maliana, munisípiu Bobonaru, relata katak nia uma tuan sobu tiha ona hodi halo rekonstrusaun foun, maibé prosesu la’o tarde no la tuir planu.
Problema ne’e obriga nia ho nia família tenke hela fali iha uma dapur ne’ebé nia kondisaun ladún di’ak durante tinan ida-resin.
Notísia relevante: Benefisiáriu sira iha Tunubibi haksolok ho programa Uma Dignu ba Povu
“Agora ami terus hela. Uluk ami-nia uma sei iha ne’e la hanesan ne’e ida. Sira sobu tiha ami-nia uma to’o agora rezultadu laiha. Udan mai kalan ami toba la di’ak, tanba udan-been tun iha kalen ku’ak ne’e”, nia informa ba jornalista sira, ohin.
Manuel adianta katak traballadór sira lakontinu serbisu, tanba emprza seidauk halo pagamentu ba sira.
Relasiona ho asuntu ne’e, benefisiáriu Manuel husu ba Ministériu Dezenvolvimentu Rurál no Abitasaun Komunitária (MDRHC, sigla portugues) atu buka solusaun, nune’e konstrusaun bele hahú hikas.
“Se lakohi hanesan ne’e, ami na’in sosa kalen taka de’it ona, tanba agora udan hela. Ami mós presiza mahon di’ak. Governu halo uma ne’e atu asegura ami hela iha fatin di’ak. Agora, ami terus fali iha udan laran”, nia preokupa.
Enjeñeiru husi empreza Rics Unipessoal Lda, Marcos Mau Laca, rekoñese katak projetu la’o atraza tanba durante ne’e sira enfrenta problema sosiál, liuliu finanseiru tanba prosesu pagamentu ne’ebé atrazu mós husi MDRHC.
Marcos Mau Laca esplika katak dezde implementasaun projetu to’o agora progresu fíziku atinje ona 68%, maibé empreza Rics Unipessoal Lda. foin hetan de’it pagamentu 5% hosi Governu.
“Durante ne’e ami-nia serbisu ladún la’o, dalaruma la’o neneik uitoan, tanba finanseiru. Pagamentu ne’ebé ami hatama ho nia burokrasia naruk. Ami hatama pagamentu durante fulan lima ou neen mós la sai ne’e mak prejudika fali prosesu konstrusaun ne’e la’o tarde. Ami husu Governu atu apoia ami-nia kompañia bele aselera liután serbisu ida-ne’e. Ami la husik serbisu tanba ami investe ona osan barak ba obra ne’e”, nia dehan.
Maski projetu ne’e la tuir alvu no planu Governu, maibé empreza mantein pozisaun atu finaliza uma balun ho 100% no entrega Governu.
Nia konfirma katak husi totál uma 25 ne’ebé konstrui, iha unidade 10 mak monta ona besi kuda-kuda no 10 mak to’o faze taka kalen-kakuluk. Unidade haat mak besik tama ona ba faze finalizasaun, falta ida mak seidauk monta panel.
“Agora uma neen ida monta ona rangka-plafon ne’e loroloron ami halo serbisu. Ami mobiliza nafatin materiál finishing mai, buka meiu oinsá para uma 10 ne’ebé taka ona kalen ami finaliza para Governu aprova ami-nia osan, hodi kontinua fali sira ne’ebé seidauk hotu ne’e”, nia realsa.
Projetu konstrusaun Uma Dignu iha aldeia Tunubibi ne’e empreza Rics ezekuta ho valór orsamentu $798.762,26 ho kontratun nia durasaun hahú iha fulan-Dezembru 2024 no remata iha Jullu 2025.
Notísia relevante: Assanami triste konstrusaun Uma Dignu iha Tunubibi finaliza tarde
Jornalista: Sergio da Cruz
Editora: Maria Auxiliadora
