BOBONARU, 02 Marsu 2026 (TATOLI)-Prezidente Autoridade Munisípiu Bobonaru, Paulo Moniz Maia, halo lansamentu ba Programa Merenda Eskolár tinan letivu 2026, iha Eskola Bázika Katólika Sagrado Coração de Jesus, iha suku Ritabou, postu administrativu Maliana.
Ho lansamentu simbóliku ne’e, programa referidu sei implementa iha eskola sira iha postu administrativu lima durante loron efetivu 140, ho orsamentu millaun $1,7.
Programa ne’e sei sobre Pré-Eskolár Públiku 42, Ensinu Báziku Sentrál Públiku no Filiál 137, Ensinu Pré-Eskolár Katólika Privadu 9 no Ensinu Bazíku Katólika Privadu 16.
Notísia relevante: EJP 38 asina kontratu ho Autoridade Munisípiu Bobonaru hodi implementa PME 2026
“Ha’u husu ba oan estudante sira merenda eskolár ne’ebé ema prepara, simu ba, han ba, nune’e estuda didi’ak atu aban-bainrua sai figura ida ne’ebé di’ak ba nasaun Timor-Leste, espesiálmente munisípiu Bobonaru”, Paulo Moniz hateten iha lansamentu programa ne’e.
Antigu deputadu ne’e hateten kada tinan Estadu tau osan boot ba programa ne’e ho objetivu atu dezenvolve labarik sira-nia kakutak no aumenta kreximentu isin hodi kombate problema má nutrisaun no raes-badak.
Nia husu ba Ekipa Jestaun Programa (EJP) no koziñeira sira tau importansia liu ba produtu lokál iha implementasaun programa referidu, nune’e bele hadi’ak estudante sira-nia nutrisaun.
“Presiza han ai-han nutritivu, hanesan modo-tahan, na’an, ikan, fehuk no ai-fuan sira hudi, apel, saburaka no seluk tan. Ita ema moris ne’e han, hemu di’ak tuir oras, fíziku, mentál, kakutak di’ak ne’e mak ita presiza, tanba ita-nia oan sira mak futuru rai ida-ne’e nian”, nia dehan.
Totál estudante benefisiáriu programa ne’e hamutuk 30.178, kompostu husi Pré-Eskolár Públiku 2,494, Ensinu Bazíku Públiku 24.961, Ensinu Pré- Eskolár Katólika Privadu 471 no Ensinu Báziku Katóliku Privadu 2.252.
Notísia relevante: Gracia-Agro distribui foos fortifikadu tonelada 250 ba eskola iha Bobonaru
Jornalista: Sergio da Cruz
Editora: Maria Auxiliadora
