BOBONARU, 02 Fevereiru 2026 (TATOLI)-Ekipa Jestaun Programa (EJP) husi Eskola Públika no Privada hamutuk 38 selebra kontratu ho Autoridade Munisípiu Bobonaru hodi implementa Programa Merenda Eskolár (PME) tinan 2026 ho orsamentu millaun $1,7.
Sekretáriu Autoridade Munisípiu Bobonaru ba Asuntu Sosiál no Organizasaun Komunitária, Júlio Carvalho Caero, husu ba EJP sira atu ezekuta orsamentu ne’e tuir matadalan, nune’e estudante sira bele hetan merenda eskolár ne’ebé saudavel no nutritivu.
Notísia relevante: Fornesedór PME iha Bobonaru tenke prepara ai-han tuir menú
“Ita iha ai-dila, hudi. Ekipa Jestaun Programa hola no lori mai hanesan tomate no seluk tan. Labele sosa sasán sira iha loja, haree grupu foti ai-han husi grupu agrikultór sira iha suku laran. Tanba durante ne’e ami observa barak mak la hola iha agrikultór sira, ida-ne’e ladún di’ak. Ein vezde redús má nutrisaun, ita hasa’e tan”, nia hateten iha asinatura ba programa ne’ebé realiza iha salaun Maria Tapó.
Lia-menon hanesan mós hato’o husi Diretór Servisu Munisipál Edukasaun Bobonaru, Miguel Freitas, ba EJP sira atu serbisu ho fuan, nune’e bele ajuda Governu atinje nia meta ne’ebé hakarak hamenus problema subnutrisaun no raes-badak iha Timor-Leste.
“Programa Merenda Eskolár ne’e la’ós buat foun. EJP sira mós ema tuan, ne’ebé ezekuta orsamentu tuir buat ne’ebé iha, ezemplu modo-tahan ne’ebé presiza ba merenda eskolár ne’e tenke fresku,labele namla’ek, ikan, na’an mós nune’e. Karik ema oho [na’an] labele fulan ida liu ba ne’e mak ita hola, haree foun ne’e mak hola, tanba programa ne’e asaun ida importante no ema iha mundu mós akompaña”, dehan.
Programa ne’e sei implementa ba loron efetivu 140 iha eskola 204, kompostu husi Pré-Eskolár Públiku 42, Ensinu Bazíku Sentrál Públiku no Filiál 137, Ensinu Pré-Eskolár Katólika Privadu 9 no Ensinu Bazíku Katólika Privadu 16.
Totál estudante benefisiáriu PME 2026 hamutuk 30.178, kompostu husi Pré-Eskolár Públiku 2,494, Ensinu Bazíku Públiku 24.961, Ensinu Pré- Eskolár Katólika Privadu 471 no Ensinu Báziku Katóliku Privadu 2.252.
Notísia relevante: Estudante rihun 29,078 iha Bobonaru sai benifisiáriu ba PME 2025
Jornalista: Sergio da Cruz
Editora: Maria Auxiliadora
