DILI, 02 Marsu 2025 (TATOLI)-Ministériu Agrikultura, Pekuária, Peska no Floresta (MAPPF) halo ona reabilitasaun, iha 2025, sentru viveiru ikan iha munisípiu 10 hodi fornese ikan-oan ba grupu akikultór sira.
Sekretáriu Estadu Peska, Domingos dos Santos, hateten sentru viveiru ikan ne’e iha mandatu Governu anteriór konstrui ona no balun la funsiona ho di’ak, nune’e Ezekutivu atuál halo fali reabilitasaun, hahú husi Bobonaru, Likisá, Ermera, Manufahi, Vikeke, Baukau, Lautein, Manatutu, no Dili. Enkuantu munisípiu Aileu ne’e hetan reabilitasaun husi Embaixada Indonézia,
“Ita halo reabilitasaun totál ba sentru viveiru sira, agora funsiona di’ak. Kada munisípiu iha sentru viveiru ida, só Manufahi mak ita koko estabelese ona rua. Sentru viveiru sira ne’e nia objetivu mak atu prodús ikan-oan hodi distribui ba komunidade akikultór sira”, Domingos dos Santos dehan ba Tatoli, ohin.
Nia subliña hafoin halo reabilitasaun ba sentru viveiru sira, nia parte mós vizita bá munisípiu sira halo sosializasaun kona-ba vantajen husi grupu akikultór hodi hasa’e sira-nia rendimentu. Daudaun iha ona grupu akikultór maizumenus 500 iha territóriu tomak.
“Ikan ne’ebé daudaun haki’ak iha sentru viveiru sira kuaze tilápia hotu, só iha Maubara-Likisá mak ikan salmon. Iha munisípiu, grupu akikultór sira balun kontribui ba merenda eskolár”, dehan.
Daudaun ne’e falta munisípiu rua mak seidauk iha sentru viveiru ikan mak Kovalima no Ainaru, maibé tinan ne’e ministériu kontinua esforsu atu estabelese.
Notísia relevante: Servisu MAPPF Viqueque planeia konstrui sentru viveiru ikan iha Uatulari
Jornalista: Arminda Fonseca
Editora: Maria Auxiliadora
