DILI, 02 Marsu 2026 (TATOLI)-Parlamentu Nasionál liuhusi reuniaun plenária, segunda ne’e, aprova pedidu asentimentu dezlokasaun Prezidente Repúblika, José Ramos-Horta, bá Portugál.
Tuir pedidu Xefe Estadu, dezlokasaun ida-ne’e atu partisipa iha serimónia tomada pose Prezidente Repúblika Portugál eleitu, António José Seguro, ne’ebé sei realiza iha loron 09 Marsu 2026.
Ramos-Horta nia prezensa ho kualidade hanesan Xefe Estadu Repúblika Demokrátika Timor-Leste no Prezidénsia Temporária Komunidade Ko’alia Lian Portugés (CPLP, sigla portugés).
Antes ne’e, iha 16 Fevereiru, Parlamentu nós aprova ona pedidu asentimentu dezlokasaun vizita ofisiál Xefe Estadu nian bá Azerbaijaun hodi partisipa iha Fórum Global Baku da-XIII, organiza husi Nizami Ganjavi International Center, ne’ebé realiza iha Baku, Azerbaijaun, hahú iha 12 Marsu. Vizita ne’e sei iha mós enkontru ho Prezidente Repúblika Azerbaijaun, Ilham Aliyev.
Informa mós vizita privada bá Hobart iha Austrália hodi partisipa iha palestra RANZCO-Royal Australian and New Zeland College of Ophtalmologists iha Universidade Tazmánia iha loron 07 fulan-Marsu ne’e.
Nune’e Xefe Estadu sei auzente iha territóriu nasionál entre loron 04 no 14 Marsu ne’e.
Notísia relevante: https://tatoli.tl/2026/02/16/parlamentu-autoriza-dezlokasaun-ofisial-prezidente-republika-ba-nasaun-tolu/
Jornalista: Nelson de Sousa
Editora: Maria Auxiliadora
