DILI, 03 Marsu 2026 (TATOLI)—Ministru Interiór, Francisco da Costa Guterres, hateten, antigu Komisáriu Komandu Polísia Nasionál Timor-Leste (PNTL) bele okupa kargu Adidu Seguransa iha rai-li’ur.
“Ita seidauk iha regulamentu klaru kona-ba esklaun ne’ebé ita la’o. Depois mak ita regulariza fali, mas daudaun ita la’o ne’e kestoes provizóriu iha tranzisaun ne’ebé laiha problema,” Ministru hato’o ba Jornalista sira hafoin partisipa serimónia Loron Nasionál Veteranu ba dala-IX ne’ebé hala’o iha edifísiu Konsellu Kombatente Libertasaun Nasionál (CCLN, sigla portugéz), Tersa ne’e.
Notísia relevante : Governu sei diskute nomeasaun foun ba KomJer PNTL
Ministru depozita konfiansa ba antigu Komisáriu PNTL, Julio Hornai hodi asumi kargu nu’udar Adidu Seguransa iha Portugal.
“Ha’u hanoin ida-ne’e laiha problema, ita la’o de’it ba laiha problema,” nia akresenta.
Antes ne’e iha meadu Fevereiru tinan ne’e Governu liuhusi Ministériu Interiór nomea antigu Komandante Jerál PNTL Komisáriu Julio da Costa Horna ba Adidu Seguransa iha Portugal.
Iha dekretu-lei nú. 55 /2022, 03 Agostu kona-ba orgánika PNTL la iha artigu mak regula katak antigu Komandante Jerál PNTL labele halo knaar hanesan Adidu Seguransa iha rai seluk kuandu hetan fiar husi Governu.
Jornalista : Natalino Costa
Editora : Julia Chatarina
