DILI, 13 janeiru 2023 (TATOLI) – Primeiru-Ministru hanesan mós Ministru Interiór, Taur Matan Ruak, hateten Governu sei diskute nomeasaun foun ba Komandante Jerál Polísia Nasionál Timor-Leste (PNTL).
“Daudaun ne’e ami seidauk koalia kona-ba ida ne’e, maibé iha tempu badak ami sei haree”, Taur Matan Ruak, hateten ba jornalista sira hafoin hasoru malu ho Prezidente Tribunál Rekursu, Deolindo do Santos, iha nia kna’ar fatin Caicoli, sesta ne’e.
Primeiru-Ministru akresenta Governu seidauk koalia kona-ba asuntu nomeasaun foun ba KomJer PNTL tanba sei haree servisu uma laran Ezekutivu nian.
“Ha’u mós foin tama iha dia 10 fulan janeiru ida ne’e, tanba ne’e, agora daudaun ami seidauk koalia kona-ba asuntu nomeasaun Komandante Jerál PNTL foun, maibé ami sei haree ba servisu uma laran nian, liuliu haree ba servisu Governu nian ne’ebé iha”, Xefe Ezekutivu revela.
KomJer PNTL Komisáriu, Faustino da Costa, sei konklui mandatu iha 27 marsu 2023.
Rekorda katak atuál KomJer PNTL, Komisáriu Faustino da Costa, simu pose iha 27 marsu 2019 hodi lidera institusaun PNTL ba mandatu tinan-haat hodi troka KomJer PNTL sesante, Komisáriu Julio Hornai.
Jornalista: Natalino Costa
Editór : Zezito Silva
