DILI, 03 Marsu 2026 (TATOLI)—Ekipa Komisaun Revizaun ba vaga rekrutamentu membru foun Polísia Nasionál Timor-Leste (PNTL) 2025 ne’ebé Governu forma, hahú halo ona serbisu.
Ministru Interiór, Francisco da Costa Guterres, hateten, bainhira Konsellu Ministru aprova desizaun atu suspende prosesu rekrutamentu vaga ba membru foun PNTL 2025, nune’e liuhusi Rezolusaun Governu fó kbiit ba Ministru Interiór hodi forma kedan ekipa, ne’ebé hahú serbisu iha loron 23 Fevereiru 2026.
“Rezolusaun sai ona, Governu mandata tiha ona, komisaun ne’e daudaun halo ona serbisu, sira reuniaun ona iha semana kotuk ne’ebé agora ba oin ha’u labele ko’alia buat ruma. Purke ha’u ko’alia politikamente bele influénsia ninian rezultadu serbisu, ne’ebé ha’u husik hela buat ruma imi ko’alia ho komisaun, komisaun mak sei anúnsia rezultadu,” Ministru Interiór hato’o ba Jornalista sira hafoin partisipa iha serimónia Loron Nasionál Veteranus ba dala-IX, iha efisiu Konsellu Kombatente Libertasaun Nasionál (CCLN, sigla portugéz), Tersa ne’e.
Notísia relevante : Aplikante vaga PNTL la submetidu ba prova médiku hahú hato’o reklamasaun
Ekipa sira ne’e kompostu hus Polísia Austrálianu, Guarda Nacional Republicano (GNR), ekipa MI nian, Prevedór Direitu Humanu Justisa (PDHJ), Komisaun Funsaun Públika, Veteranu, Jerasaun Patriota, Jurists balun, Ministériu Edukasaun, Sekretaria Estadu Igualudade Inkluzaun, Komisaun B Parlamentu Nasionál no Pesoa Prezidensiá Repúblika mós hola parte iha komisaun ne’e.
Ministru garante ema sira ne’ebé nia hili bele halo serbisu ho trasnparánsia.
“Ita tenke fiar sira, nu’udar timoroan ha’u tenke fiar sira, ha’u hatene katak sira iha kapasidade, sira sei iha kapasidade atubele rezolve problema ne’e. Ne’ebé ha’u tau fiar ba sira 100%,” nia otimista.
Governante ne’e garante ekipa sira ne’e sei rezolve problema ne’e no hasai rezultadu di’ak.
“Komisaun supervizasun ne’e la’ós lideradu husi Komandu Jerál PNTL, Segundu Komandante Jerál lae, ne’e ketak ida. Ministériu nia ema mak lidera,” nia katak.
Jornalista : Natalino Costa
Editora : Julia Chatarina
