VIKEKE, 03 Marsu 2026 (TATOLI)–Komemorasaun Loron Nasionál Veteranu ba Dasiak (03 Marsu 2017-03 Marsu 2026), Prezidente Autoridade Munisípiu Vikeke, Francisco C. S de G. Soares, husu veteranu sira kontinua apoia prosesu dezenvolvimentu iha Munisípiu Vikeke tanba veteranu sira mak prezente no futuru ba dezenvolvimentu.
“Ohin sai momentu importante ba ita hotu hodi komemora Loron Nasionál Veteranu sira-nian. Liuhusi komemorasaun ida-ne’e ita hanoin hikas ita-nia eroi sira no valoriza sira-nia sakrifísiu luta ba ukun rasik-an. Veteranu sira kontribui ba dezenvolvimentu ne’ebé ita goza ohin loron. Nune’e, ha’u reafirma katak sei kontinua valoriza no bem-estar veteranu sira-nian liuhusi programa soisiál no envolve sira iha prosesu dezenvolvimentu,” Francisco C. S de G. Soares, hateten iha serimónia isár bandeira iha resintu Administrasaun Munisípiu Vikeke, Tersa ne’e.
Notísia relevante: Autoridade Vikeke-CCLN kari ai-funan no sunu lilin iha Jardín Eroi Kraras komemora Loron Nasionál Veteranu
Autoridade Vikeke ne’e afirma serimónia komemorasaun Loron Nasionál Veteranu sai momentu importente ba povu Vikeke atu hametin espíritu patriotizmu no unidade nasionál, hasa’e konxiénsia kona-ba devér no responsablidade sidadaun nian, hadi’a servisu ba povu no halo Munisípiu Vikeke sai fatin ba dame, establidade no progresu.
Francisco konvida povu Vikeke partisipa ativa iha prosesu dezenvolvimentu tanba dezenvolvimentu la’ós responsavel husi parte Governu, maibé responsablidade hamutuk entre lideransa lokál, juventude feto no mane inklui sosiedade tomak.
“Ita presiza hametin servisu hamutuk no fó sujestaun konstrutiva ba programa dezenvolvimentu ne’ebé autoridade implementa hanesan hadi’a infaestrutura, mellora servisu públiku no hasa’e bem-estar komunidade Vikeke nian,” nia subliña.
Iha ámbitu komemorasaun ne’e, Prezidente Konsellu Kombatente Libertasaun Nasionál (KKLN) Munisípiu Vikeke, Adriano Câmara “Lentil”, hateten veteranu sei kontinua koopera no apoiu Estadu no Governu ba prosesu dezenvolvimentu iha Timor-Leste.
“Nu’udár veteranu sei koopera ho Estadu no Governu hodi hala’o dezenvovimentu iha Timor-Leste. Veteranu sei la kontra ida-ne’e. Tanba ne’e ami-nia obrigasaun harii ona nasaun, entaun tenke koopera atu nasaun referida bele dezenvolvidu,” nia hato’o.
Partisipa iha serimónia komemorasaun Loron Nasionál Veteranu ne’e partisipa husi autoridade lokál, Polísia Nasionál Timor-Leste (PNTL) Munisípiu Vikeke, veteranu, funsionáriu no estudante sira.
Lentil apela joven banati tuir gerilleiru sira
Iha ámbitu komemorasaun Loron Nasionál Veteranu ne’e, Prezidente KKLN Munisípiu Vikeke, Adriano Câmara “Lentil”, apela ba joven sira iha Munisípiu Vikeke banati tuir gerilleiru sira hodi halibur malu.
“Ba juventude imi tenke banati tuir ain fatin gerilleiru sira hodi akumula ita-nia povu. Labele fahe malu. Tenke iha unidade ne’ebé metin. Ida-ne’e importante ba joven sira,” Lentil hateten ba jornalista sira.
Tuir veteranu ne’e katak bainhira unidade metin, ema sobu difísil.
“Ami veteranu sira-ne’e katuas hotu ona. Aban-bainrua ami laiha, jerasaun foun sira nafatin kaer metin hanoin ida-ne’e,” nia haktuir.
KKLN realiza reflesaun kalan
Antes ne’e, Segunda (02/03) kalan, Konsellu Kombatente Libertasaun Nasionál (KKLN) Munisípiu Vikeke realiza reflesaun kalan ho tema: “Unidade iha diversidade ho sentidu patriotizmu”.
Prezidente Autoridade Munisípiu Vikeke, Francisco C. S de G. Soares, haktuir reflesaun ne’e realiza atu selebra Loron Nasionál Veteranu nian hodi rekorda no valoriza sakrífisiu boot husi veteranu sira ne’ebé luta ho korajen ba determinasaun ukun rasik-an.
Autoridade Munisípiu Vikeke ne’e esplika veteranu sira-nia kontribuisaun la’ós sai istória de’it, maibé sai fundasaun ba dezenvolvimentu no dame ne’ebé ema hotu goza ohin loron.
Nune’e, Francisco dehan, reflesaun ida-ne’e importante atu hatene loloos istória luta libertasaun nian, aprende kona-ba valór patriotizmu, unidade no responsablidade.
Iha fatin hanesan, Prezidente KKLN Munisípiu Vikeke, Adriano Câmara “Lentil”, hateten reflesaun ida-ne’e hodi relembra sofrimentu sira-ne’ebé veteranu sira enfrenta iha tempu okupasaun estranjeira.
Partisipa iha reflesaun ne’e kompostu husi estrutura Autoridade Munisipál Vikeke, Prezidente KKLN ho estrutura, Komandante PNTL Vikeke ho estrutura, Prezidente CCITL Vikeme, veteranu, membru Komité 12 Novembru, família kombatente, funsionáriu no estudante sira iha Munisípiu Vikeke.
Jornalista: Vitorino Lopes da Costa
Editór: Xisto Freitas da Piedade
