VIKEKE, 02 Marsu 2026 (TATOLI)—Autoridade Munisípiu Vikeke hamutuk ho Konsellu Kombatente Libertasaun Nasionál (CCLN-sigla portugeza), Segunda ne’e, selebra Loron Nasionál Veteranu liuhusi misa agradesimentu, kari ai-funan no sunu lilin iha Jardín Eroi Kraras, Suku Bibileo, Postu Administrativu Vikeke Vila.
Iha serimónia misa agradesimentu ne’e, Amu Selebrante, Pe. Arlindo Leonardo Siqueira da Silva, haktuir misa agradesimentu ne’e importante tebes tanba atu hanoin hikas loron eroi sira-nian ne’ebé sira fó sira-nia kontribuisaun ba luta libertasaun nasionál iha Timor-Leste.
“Veteranu sira-nia prinsípiu mak luta ho valór ida ukun rasik-an. Veteranu sira luta iha ai-laran balun mate, balun oras ne’e sei moris. Sira hasoru terus iha ai-laran, hosoru udan no anin durante luta iha tinan 24 nia laran. Tanba ne’e, veteranu sira-nia luta ne’e dignidade nasaun Timor-Leste nian. Ita-nia veteranu sira mak nu’udár fundadór istória ba luta libertasaun nasionál,” Pe. Arlindo Leonardo Siqueira da Silva hateten iha Igreja Imaculada Conceição, Postu Vikeke Vila.
Notísia relevante: Governu prevee rihun $150 ba Loron Nasionál Veteranu
Nia aprofunda veteranu sira-nia luta mak sai defeza ba soberania, nune’e veteranu sira tenke hamutuk.
Iha serimónia kari ai-funan no sunu lilin, Prezidente KKLN Munisípiu Vikeke, Adriano Câmara “Lentil”, hateten selebrasaun Loron Nasionál Veteranu ne’e ema barak lori sira-nia sakrifísiu hodi dedika an ba funu atu konkista direitu povu no nasaun Timor-Leste nian, tan ne’e ohin loron hetan rezultadu nasaun ida-ne’e sai independénsia.
“Tanba ne’e ita hotu-hotu hamutuk no lori ita-nia hanoin hamutuk hodi dezenvolve nasaun Timor-Leste”, nia akresenta.
Entretantu, partisipa iha misa agradesimentu no kari ai-funan no sunu lilin kompostu husi Prezidente Autoridade Munisípiu Vikeke, Sekretáriu Munisípiu Vikeke, reprezentante Komandante Polísia Nasionál Timor-Leste (PNTL) Munisípiu Vikeke, diretór munisipál, veteranu, autoridade lokál, funisionáriu, estudante no komunidade.
Estadu deside loron 03 Marsu ne’e sai Loron Nasionál Veteranu tanba iha loron 03 Marsu 1981, Timor-Leste hahú reorganiza funu ba libertasaun nasional, hafoin baze-de-apoiu rahun.
Data istórika ne’e liga ba Konferénsia Nasionál FRETILIN iha Maubai (Vikeke) no iha loron 03 Marsu ho orientasaun hosi membru Comité Central da FRETILIN (CCF) sobrevivente na’in-rua, Xanana Gusmão no Ma’Huno, no konferensista sira hili membru CCF na’in-sia (9) foun tan no foti desizaun importante lubuk ida, hodi libertasaun nasionál iha reorganiza luta territóriu tomak.
Hosi konferénsia ida-ne’e mak rezisténsia armada moris filafali iha ai-laran no povu hetan fali nia esperansa no halo mundu hakfodak.
Selebrasaun dahuluk ba Loron Nasionál Veteranu ne’e, akontese iha tinan 2017. Veteranu no Kombatente Libertasaun Nasionál sira mak kompostu hosi frente armada, frente klandestina no frente esterna ka diplomátika.
Jornalista: Vitorino Lopes da Costa
Editór: Xisto Freitas da Piedade
