BAUKAU, 03 Marsu 2026 (TATOLI)–Prezidente Autoridade Munisipál (PAM) Baukau, Veneranda Eurico Lemos Martins husu ba jerasaun foun Baukau-oan atu kontinua banati tuir espíritu luta husi veteranu.
Veneranda rekoñese veteranu sira-nia luta nu’udár eransa ne’ebé husik hela la’ós de’it liberdade polítika maibé responsabilidade morál hodi harii nasaun Timor-Leste ho justisa no prosperidade.
“Ohin loron ita tama ba faze luta foun nian hanesan luta hasoru ignoránsia no dezigualdade sosiál,” Veneranda Lemos hateten bainhira sai inspetór ba serimónia isár bandeira iha resintu Administrasaun Munisipál Vila Nova, Baukau, Tersa ne’e.
Notísia relevante: Autoridade Baukau realiza misa agradesimentu hodi selebra Loron Nasionál Veteranu
Eis deputada ne’e konsidera selebrasaun Loron Nasionál Veteranu ba dasiak nu’udár parte husi Estadu nia rekoñesimentu ba sakrifísiu ne’ebé kontribui husi kombatente ba libertasaun nasionál.
Aleinde ne’e, nia hatutan, liuhusi selebrasaun Loron Nasionál Veteranu la’ós hanesan serimónia offisiál maibé nu’udár momentu reflesaun ba sidadaun hotu hodi hametin unidade nasionál atu salva guarda istória luta nian.
Veneransa subliña sidadaun hotu tenke agradese ba kombatente sira-nia luta iha pasadu hanesan naroman ne’ebé hatudu dalan ba jerasaun foun bainhira atu la’o bá-oin.
Entretantu, selebrasaun Loron Nasionál Veteranu iha Munisípiu Baukau realiza ho isár bandeira no animasaun iha-ne’ebé antes ne’e iha loron Segunda (02/03/2026) realiza misa agradesimentu no kari ai-funan. Eventu ne’e hala’o ho alokasaun orsamentu $4.500 ne’ebé apoia husi CCLN $2.500 no AMB rihun $2.
Seremónia isár bandeira ne’e partisipa husi autoridade sivíl no militár, administradór postu administrativu, xefe suku, veteranu, estudante no komunidade iha Baukau Vila.
Igreja husu veteranu unidade
Igreja Katólika liuhusi Pároko Parókia Santu António Vila Antiga Baukau, Manuel Ximenes husu ba veteranu sira atu kontinua unidade nune’e dignifika eroi sira-ne’ebé mate ba ukun rasik-an.
Padre Manuel hateten veteranu kontinua sai ezemplár liuliu kuda espíritu unidade ba malu hanesan tempu rezisténsia tanba papél seluk ne’ebé atuál presiza atu halo iha ukun-an mak kontinua sai lutadór ba dezenvolvimentu tuir objetivu funu katak liberta rai no povu.
“Papél inportante ida husi veteranu mak luta ba dezenvolvimentu liuliu interese komún,” nia subliña Padre iha selebrasaun Loron Nasionál Veteranu.
Aleinde ne’e, Padre Manuel husu veteranu tenke nafatin sai ema-ne’ebé laran di’ak liuliu konkretiza nasaun iha sosiedade, hakbiit malu hodi apoia autoridade lokál nune’e jerasaun foun sira atu banati tuir.
Veteranu Kuitadu husu jerasan foun kontinua estuda
Iha parte seluk, Kombatente Libertasaun Nasionál, Teotónio Soares ‘Kuitadu’ husu jerasan foin-sa’e atu aprende liuhosi estuda maka’as iha setór edukasaun nune’e kontinua luta hodi liberta povu husi ki’ak.
Tuir veteranu ne’e katak setór edukasun nu’udár fatór determinante ba nasaun Timor-Leste iha-ne’ebé papél ida-ne’e responsabiliza husi jerasaun foun liuliu juventude nune’e hatutan mehi eroi nian atu liberta povu husi ki’ak no mukit.
“Ami veteranu sira-nia tempu hamriik kaer kilat halo funu to’o liberta ita-nia rai. Agora joven sira tenke eskola matenek, rona no haree hodi hatutan luta liberta povu,” Kuitadu hateten bainhira partisipa serimónia isár bandeira hodi komemora Loron Nasionál Veteranu ba Dasiak iha Vila Nova.
Kuitadu hateten kombatente sira deside sakrifika an ba luta mezmu lahatene hakerek no lee maibé únidu ho objetivu ida de’it mak ukun rasik-an, nune’e iha esperansa ba jerasaun foun atu kapasita an hodi lidera hikas nasaun ho prinsípiu liberta povu.
Kuitadu relata veteranu sira nafatin iha devér hodi apoia morál ba jerasaun foun liuliu buka dalan atu oan sira asesu ba edukasaun iha nivel universitáriu nune’e sai matenek tanba iha futuru bele jere nasaun sai dezenvolvidu.
Jornalista: Natalino Belo
Editór: Xisto Freitas da Piedade
