VIKEKE, 04 Marsu 2026 (TATOLI)—Koordenadór Sentru Saúde Internamentu Munisípiu Vikeke, Francisco da Costa, informa, hahú husi Janeiru to’o Fevereiru Sentru Saúde Internamentu Vikeke rejista kazu dengue hamutuk na’in-170 ne’ebé rekuperadu no kazu foun hamutuk na’in-haat.
“Ita hahú rejista kazu dengue iha 20 Janeiru to’o Fevereiru totál hamutuk na’in-170. Husi númeru kazu ne’e rekupera hotu ona maibé iha inísiu Marsu ne’e ita rejista fali kazu dengue hamutuk na’in-haat (4) ne’ebé daudaun ne’e sei baixa iha internamentu Vikeke,” Francisco da Costa ba jornalista sira iha Vikeke, Kuarta ne’e.
Koordenadór ne’e relata, pasiente dengue na’in-haat ne’e kompostu husi feto rua no mane rua, iha-ne’ebé husi Bikarin, Suku Bahalaraua’in na’in-tolu (3) no husi Suku Afaloikai, Postu Uatulari na’in-ida (1). Pasiente na’in-haat ne’e, idade 15 iha na’in-ida, idade 13 na’in-rua no na’in-ida foin halo tinan ida.
Notísia relevante: Kazu dengue iha Vikeke hamutuk 29, na’in-18 rekuperadu
“Kondisaun atuál pasiente dengue na’in-haat ne’e kondisaun di’ak hela. Nune’e, ami kontinua akompaña, karik reasaun ruma grave ami sei halo transferénsia bá Baukau,” nia hato’o.
Kona-ba tratamentu kazu dengue, Francisco dehan, servisu saúde internamentu atende pasiente kazu dengue bazeia ba protokolu saúde mak hanesan koko pasiente sira-nia kondisaun, tau soru, fó ai-moruk parsetamól no ai-moruk multi vitamina.
Nia hatutan númeru kazu dengue ne’ebé rejistadu iha Munisípiu Vikeke agora daudaun menus ona no la rejista ema mate.
Francisco apela ba komunidade iha Munisípiu Vikeke kontinua halo prevensaun ba dengue no halo limpeza ba idaidak nia hela fatin, labarik sira toba karik tenke uza muskiteiru.
Entrentntu, pesoál saúde ne’ebé servisu iha Sentru Saúde Internamentu Vikeke hamutuk na’in-20, kompostu husi enfermeiru na’in-14 no médiku na’in-neen (6) ne’ebé daudaun ne’e ativu fó atendimentu ba pasiénte sira-ne’ebé baixa iha Internamentu Vikeke.
Jornalista: Vitorino Lopes da Costa
Editór: Xisto Freitas da Piedade
