DILI, 04 Marsu 2026 (TATOLI) – Autoridade Nasionál Petróleu (ANP) ho ekipa espesialisita sira hahú semana ne’e halo negosiasaun ho Governu Austrália iha Dili kona-ba finalizasaun ba dokumentu Esplorasaun Kódigu Mineiru ba Petróleu (PMC), Kontratu Fahe Produsaun no Rejime Fiskál.
“Prosesu Greater Sunrise orsida loraik ami ko’alia tan ho Woodside. Hahú husi segunda semana ida-ne’e, ANP ne’ebé lidera husi Prezidente Gualdino do Carmo da Silva ho nia ekipa espesialisita tomak agora negosia hela ho Austrália iha Dili. [Negosiasaun] sei hotu iha sesta semana ne’e”, Ministru Petróleu no Rekursu Minerál, Francisco Monteiro, informa iha Ministériu Finansa, ohin.
Nia esplika katak prosesu negosiasaun ba Greater Sunrise ne’e iha aspetu lubun ida, maibé dokumentasaun tolu importante mak tratadu ezije atu presiza finaliza. “Ne’e ita iha konfiansa katak parte balun husi ne’ebá bele finaliza daudaun ona no ita-nia alvu iha Marsu nia-laran”, nia dehan.
Antes ne’e, Ministru Petróleu no Rekursu Minerál informa katak Governu Timor-Leste (TL) no Austrália kontinua halo kontaktu ba malu hodi finaliza dokumentu sira relasiona ho dezenvolvimentu Projetu Greater Sunrise, neʼebé posivel atu konkretiza iha tinan ida-ne’e.
Francisco Monteiro hateten katak progresu Projetu Greater Sunrise kontinua la’o di’ak, ho objetivu atu asegura kadoras mai Timor-Leste neʼebé viavel husi aspetu tékniku no komersiál.
“Tama ba tinan foun, ita kontinua inisia kontaktu no iha Marsu 2026 ita sei iha filafali ronda negosiasaun ida. Ita tama ba finalizasaun dokumentu importante tolu ne’ebé tratadu ezije mak Esplorasaun Kódigu Mineiru ba Petróleu, Kontratu Fahe Produsaun no Rejime Fiskál”, Francisco Monteiro realsa foin lalais ne’e.
Notísia relevante: TL-Austrália halo ronda negosiasaun hodi finaliza dokumentu dezenvolvimentu Greater Sunrise iha Marsu
Jornalista: Arminda Fonseca
Editora: Maria Auxiliadora
