SEFOPE rejista Kovalima-oan na’in-247 servisu iha Austrália
KOVALIMA, 04 Marsu 2026 (TATOLI)- Sekretáriu Estadu Formasaun Profisionál (SEFOPE), iha tinan-2025 rejista ona Kovalima-oan na’in-247 mak bá servisu ona iha Austrália.
“Ita-nia Kovalima-oan, iha tinan-2025 ne’ebé mak servisu ona iha Austrália ne’e hamutuk 247 no traballadór ba servisu iha Noza- Zelandia na’in-10,” Diretór SEFOPE Munisípiu Kovalima, Estefanos Segundu Manek, informa ba Jornalista sira iha Edifísiu SEFOPE Kovalima Tabakolot.
Atu aumenta númeru traballadór, nia dehan kontinua fasilita formasaun dalen inglés iha sentru formasaun sira atu hasa’e abilidade Kovalima-oan hodi ba servisu iha Austrália.
SEFOPE la fó servisu ba traballadór, maibé fasilita de’it traballadór sira bá servisu iha rai-li’ur, SEFOPE kontinua fasilita formasaun lian inglés ba etapa da-haat, nune’e SEFOPE rejista ona kandidatu traballadór sira nia naran atu tuir formasaun dalen inglés iha sentru Formasaun Lakonak hamutuk 23.
“Ita fó oportunidade ba kandidatu traballadór hein took traballadór ho valór poor ho very poor atu tuir formasaun,” nia dehan.
Atu fasilita formasaun dalen inglés iha sentru formasaun ba faze dahaat SEFOPE Kovalima seidauk hahú foin mak halo rejista, tanba sei hein desizaun husi SEFOPE nasionál.
Jornalista:Celestina Teles
Editór:Florencio Miranda Ximenes
