DILI, 05 Marsu 2026 (TATOLI)—Diretór Hali Ba Dame (HABADA), Abel Amaral, nota katak, maski iha dezafiu barak iha rai-laran kona-ba kestaun seguransa, maibé membru Polísia Nasionál Timor-Leste (PNTL) konsege hatudu serbisu di’ak.
“Tuir HABADA nia observasaun, membru PNTL sira hatudu sira-nia serbisu di’ak, ezemplu sira iha eventu boot iha tinan kotuk no tinan kotuk liubá, Santo Papa nia vizita, Timor-Leste sai uma-na’in ba eventu internationál, Timor-Leste hetan vizita husi alta entidade sira, nune’e situasaun seguransa la’o ho diak,” Diretór hato’o ba Ajénsia TATOLI, iha ninia knaar fatin, Komoro, Kinta ne’e.
Nia apresia, Komandu Jerál PNTL ne’ebé atu kondekora medalla komportamentu ezemplár ba membru sira ne’ebé dedika-an ba instituisaun durante tinan 25 nia laran iha ámbitu aniversáriu ezisténsia PNTL, iha 27 Marsu tinan ne’e.
” HABADA hakarak hato’o apresiasaun no parabéns ba membru PNTL sira hotu ne’ebé dedika sira-nia an ba estadu hodi asegura seguransa rai-laran ho di’ak. Apresia ba Komandu atu kondekora membru sira ho medalla komportamentu ezemplár iha aniversariu ezisténsia PNTL iha 27 Marsu. Ida-ne’e inisiativa ne’ebé di’ak, membru presiza hetan apresiasaun tanba ho sira-nia dedikasaun, abnegasaun no lealdade mak ohin dezenvolve institusaun PNTL la’o di’ak nafatin,” nia akresenta.
Notísia relevante : DNTT-PNTL halo operasaun konjunta garante ordenamentu estasionamentu iha loja sira
Diretór dehan, maski Komandu hasoru dezafiu oioin, maibe membru sira nafatin hala’o sira-nia serbisu tuir orientasaun no regra. Situasaun di’ak hirak ne’e hotu konta mós kontribuisaun husi parte hotu.
“Hahú husi membru PNTL sira hotu no instituisaun Estadu sira seluk. Aleinde ne’e, kontribui mós husi líder komunitária s, joventude, nomós komunidade iha territóriu tomak,” nia katak.
Iha biban ne’e, Abel Amaral ko’alia kona-ba promosaun ba ofisiál superiór ne’ebé atu hetan promosaun hanesan kompeténsia husi Ministru Interiór no Komandu Jerál.
“Promosaun ne’e buat normal ne’ebé akontese ba instituisaun hotu-hotu inklui iha instituisaun PNTL ne’e rasik. Promosaun deviza no kondekorasaun ne’e mós bazeia ba regra, liuliu iha Dekretu Lei nú. 35/2024. Promosaun no kondekorasaun ne’e Estadu hatudu rekoñesimentu ba sira hotu nia dedikasaun durante sira hala’o nia knaar iha nível superiór,” nia afirma.
Nia iha esperansa, h’o kondekorsaun no promosaun ba membru PNTL ne’e bele presta liután serbisu ne’ebé di’ak ba instititusaun no povu.
“Ita hein desizaun sira ligadu ho promosaun no kondekorasaun ne’ebe sei realiza, HABADA hatoo apresia no kongratula ba sira hotu. HABADA hakarak hato’o apresiasaun no parabéns ba membru PNTL sira hotu ne’ebé dedika sira-nia an ba estadu hodi asegura seguransa rai-laran ho d’iak. Mesmu Komandu hasoru dezafiu oioin maibé membru sira nafatin hala’o sira-nia serbisu tuir orientasaun no regra,” nia tenik.
Jornalista : Natalino Costa
Editora : Julia Chatarina
