KOVALIMA, 05 Marsu 2026 (TATOLI)- Servisu Munisipál Edukasaun Kovalima, simu ona kolokasaun profesór na’in-83 husi Ministériu Edukasaun (ME) hodik garante prosesu aprendizajen.
“Profesór sira ne’ebé mak Ministériu Edukasaun koloka mai ne’e presiza tuir nesesidade eskola sira iha munisípiu Kovalima,” Diretora Servisu Munisípiu Edukasaun Kovalima,Elda de Fátima informa ba jornalista sira iha Edifísiu Edukasaun Santa Rosa-Suai, ohin
Nia dehan, iha pedidu husu ba Ministra Edukasaun atu koloka professór na’in-100, maibé koloka de’it 83.
“Ministériu Edukasaun koloka profesór na’in-83 entaun ita iha munisípiu Kovalima nafatin menus professór,” nia afirma.
Tuir dadus professor hirak ne’e sei koloka bá iha EBC Ladi na’in-7, Suai Loro na’in-9 , eskola Wematan 11 no eskola seluk ne’ebé mak identifika ona.
“Profesór sira ne’e maioria Kovalima-oan no na’in-17 mak husi munisípiu sira seluk nune’e husu atu halo koordenasaun ho Diretór no koordenadór eskola sira nune’e hodi buka hela fatin atu hela”, nia sujere.
Iha biban hanesan, Superintendente Edukasaun Kovalima, Jacinto do Carmo, reforsa ho kolokasaun profesór sira mai iha munisípiu Kovalima atu troka profesór sira ne’ebé nia naran tama ona lista reforma obrigatóriu.
“ Ami fó hanoin ba profesór sira ne’ebé atu sai ezemplu simu kna’ar profesór ne’e todan maibé tenke simu ho fuan no laran tanba liuhusi teste mak ita boot sira pasa,” nia afirma.
Notísia relevante:Ministra Edukasaun inaugura eskola CAFE iha Ladi-Kovalima
Jornalista:Celestina Teles
Editór:Florencio Miranda
