DILI, 06 Marsu 2026 (TATOLI)—Ekipa Vale de Lahane (VDL) Football Club (FC) posibilidade sei dezpromovida husi primeira divizaun Liga Futeból Femininu Timor-Leste (LFFTL).
VDL FC ne’ebé to’o jogu jornada 15⁰ foin rekolla pontu hitu (7) iha-ne’ebé manán iha jogu rua (2) no impata ida (1) no derrota iha jogu 12, nune’e posivelmente dezpromovida bainhira derrota tan iha jogu ida (1) husi restu jogu tolu ne’ebé sei hala’o iha primeira divizaun LFFTL.
VDL rasik sei kontra ekipa forte Maranatha FC iha jogu jornada 16⁰ ne’ebé sei realiza iha Kampu Federasaun Futeból Timor-Leste (FFTL), Bairros dos Grilos, 07 Marsu, iha-ne’ebé volta dahuluk liubá derrota 10-0.
Notísia relevante: Maudoko FC lolo VDL 8-0
Aleinde ne’e, jornada 17⁰ sei kontinua kontra kandidatu kampiaun S’amuser FC no tuir oráriu sei hala’o iha Domingu, 15 Marsu, iha-ne’ebé rezultadu jogu volta dahuluk derrota ho skor 11-0 no iha jogu tuirmai sei hasoru ekipa médiu Akadémika FC, iha-ne’ebé iha-rezultadu jogu dahuluk derrota ho skor 1-0.
Nune’e, tuir kalkulasaun pontu iha tabela klasifikasaun, VDL presiza manán jogu tolu ikus nune’e asegura billete iha primeira divizaun, enkuantu bainhira derrota iha jogu restu, obrigadu tenke eliminadu husi kompetisaun femininu iha tinan oin.
Entretantu, ekipa Kulugisa serteja ona eliminadu husi primeira divizaun LFFTL hafoin derrota durante jornada 15⁰, enkuantu AD SLB mantein iha pozisaun dahuluk ho pontu 38 hafoin manán jogu 12, derrota ida (1) no impata rua (2) ho produtividade golu (+/-) 136 no S’amuser FC iha pozisaun daruak ho pontu 38 ho produtividade golu (+/-) 86.
Jornalista: Natalino Belo
Editór: Xisto Freitas da Piedade
