Reitór UNPAZ enkoraja estudante tenke estuda hodi hatutan eroi sira-nia mehi
DILI, 07 Marsu 2026 (TATOLI)—Reitór Universidade da Paz (UNPAZ), Adolmando Amaral enkoraja estudante UNPAZ atu estuda ka halo atividade pozitiva hodi hatutan eroi sira-nia mehi.
Nia dehan, atu nasaun la’o di’ak no povu prósperu presiza rekursu ne’ebé kualifikadu, presiza iha jestór ne’ebé di’ak, tanba ne’e estudante sira mak fini.
“Só nune’e mak ita sai forsa hodi fó alternativu. Mehi eroi sira-nia katak Timor-Leste dezenvolvimentu iha 2030, tanba ne’e ha’u nafatin enkoraja ita-boot sira estuda estuda no estuda hodi serbí ita-nia povu,” Reitór Adolmando hateten bainhira halo abertura ba orientasaun akadémika tinan letivu 2026 ne’ebé hala’o iha kampus UNPAZ, Osindo, Sábadu ne’e.
Tema ba atividade ne’e (orientasaun) mak “Papél estudante sai peskizadór kompetetivu iha Asosiasaun Nasaun Sudeste Aziátiku (ASEAN-sigla ingleza)”. Orientasaun ne’e sei hala’o durante loron tolu, 07-09 Marsu, envolve estudante hamutuk na’in-400 resin.
Adolmando mós enkoraja estudante ne’ebé foin atu tama UNPAZ iha tinan letivu 2026 nian atu esforsu buka aprende halo barak, labele husu saida mak Estadu atu fó, maibé saida estudante sira halo hodi kontribui ba nasaun.
Retór UNPAZ ne’e mós solisita estudante sira atu aproveita rede sosiál ba atividade pozitiva sira hodi hakle’an koñesimentu sira, labele uza rede sosiál hodi prejudika fali an.
Jornalista: Natalino Costa
Editór: Xisto Freitas da Piedade
