BOBONARU, 08 Marsu 2026 (TATOLI) – Autoridade Protesaun Sivíl (APC) munisípiu Bobonaru no Bombeiru hasai sedimentasaun iha Postu Integradu Mota-Ain ne’ebé kauza husi inundasaun hafoin akontese udan-boot iha loron 07 fulan ne’e.
Komandante APC Bobonaru, Zeca Michael, hateten dezastre naturál ne’e afeta ba edifísiu Alfándega no estraga sasá eletróniku balun.
“Udan-boot lori ai balun mai iha ita-nia mota iha liña fronteira nian ne’e mak bee sa’e ba Mota-ain parte ita-nia ho Indonézia, maibé bee ne’e fakar barak liu mai ita-nian. Maibé, ita hahú serbisu horisehik iha entrada nia, tanba ai nakonu ita tesi no hasai. Ita regra taho iha estrada laran, tanba mahar uituan. Ohin ita kontinua suru sai tiha mak rega”, nia informa ba Tatoli, ohin.
APC ho ekipa konjunta halo intervensaun atu normaliza atendimentu iha Pontu Integradu Mota-Ain. “Ita foin loke entrada viajen tama-sai ne’e iha tuku 09h10. Agora, ema antrian hela”, katak.
Limpeza jerál ne’e hetan apoia mós husi ekipa nasionál no Bombeiru Likisá, inklui Autoridade Munisípiu Bobonaru no ekipa Ministériu Obra Públika no Autoridade Aduaneira Batugadé no seluk tan.
Notísia relevante: APC Bobonaru rejista uma-kain 88 vítima ba dezaste naturál
Jornalista: Sergio da Cruz
Editora: Maria Auxiliadora
