APC Bobonaru rejista uma-kain 88 vítima ba dezaste naturál
BOBONARU, 03 Fevreiru 2026 (TATOLI)-Autoridade Protesaun Sivíl (APC, sigla portugés) munisípiu Bobonaru rejista, iha Janeiru, família 88 mak sai vitima ba dezastre naturál.
Komandante APC munisípiu Bobonaru, Zeca Michael Lopes, hateten família hirak ne’e sai vítima inundasaun ne’ebé akontese iha suku Aidaba-Leten, postu administrativu Atabae no anin sobu uma iha suku Oe-leu, postu Bobonaru no ida iha Balibó.
Husi vítima afetada ne’e, iha uma-kain lima mak sei hetan apoia rekuperasaun iha tempu tuirmai, tanba uma aat kaman, natoon no aat totál.
APC mós rejista iha sidadaun na’in-rua mak tara-an, ida iha suku Goulolo, postu Kailaku no seluk iha suku Leber, postu Bobonaru.
Dirijente APC munisípiu Bobonaru ne’e alerta ba komunidade atu hadook-an husi fatin risku sira, hanesan ai-hun boot, foho-lolon no mota-ninin, nune’e bele prevene-an husi dezastre naturál.
“Karik udan ho anin-boot bele evakua uma provizóriu, tanba ita-nia klima ba oin ne’e sei mosu tan udan no anin-boot”, dehan.
APC mós identifika katak postu administrativu Atabae, Kailaku no Balibó sai fatin risku ba inundasaun, enkuantu postu Bobonaru no Lolotoe risku ba anin-boot no rai-halai.
Tuir dadus 2025, entre Janeiru no Novembru, APC rejista vítima dezastre naturál hanesan anin-sobu uma 52, ahi han 48, rai-halai afeta uma sia, rai-lakan hamate ema ida, mout iha mota ida no tasi ida. Vítima afetada sira ne’ebé hetan apoiu rekuperasaun hamutuk família 31.
Notísia relevante: APC alerta ba komunidade Bobonaru hadook-an husi fatin risku
Jornalista: Sergio da Cruz
Editora: Maria Auxiliadora
